ზაქარია ენდელაძე: ლობჯანიძეს გუნდურობის პრინციპი არ გამოუვიდა

„მე ნამდვილად ვერ გეტყვით როგორ მუშაობდა ლევან ლობჯანიძე. ის საკრებულოში დეპუტატებთან ერთად მუშაობდა და როგორც დღეს გაირკვა, გუნდურობისა და კოლეგიალობის პრონციპი რატომღაც არ გამოუვიდა“, – ასე აფასებს საკრებულოს დღევანდელ გადაწყვეტილებასა და ლობჯანიძის გადაყენებას ადიგენის მუნიციპალიტეტის გამგებელი ზაქარია ენდელაძე და ამატებს, რომ რაც დღეს ადიგენის მუნიციპალიტეტის საკრებულოს სხდომაზე მოხდა, ლობჯანიძის საკრებულოში მუშაობის შედეგია.

თუმცა, სხვაგვარი მოლოდინი ჰქონდა და ლობჯანიძეზეც სხვაგვარად საუბრობდა ენდელაძე გასული წლის ივლისში, მაშინ, როდესაც ახალი მოწვევის საკრებულოს თავმჯდომარედ ლევან ლობჯანიძე აირჩიეს.

„ლევან ლობჯანიძე კომუნიკაბელური და განათლებული პიროვნებაა. რამდენიმე თვეა რაც გავიცანი და იმედი მაქვს, რომ მასთან კონსტრუქციულად და ნაყოფიერად ვიმუშავებ“, – განაცხადა მაშინ ენდელაძემ „სამხრეთის კარიბჭესთან“.

ასევე განათლებულ და მოწესრიგებულ პიროვნებად ახასიათებს გამგებელი საკრებულოს ახალ თავმჯდომარეს: „ახალი საკრებულოს თავმჯდომარე ძალიან კარგი ადამიანია. განათლებული და მოწესრიგებული. მას წარმატებას ვუსურვებ. ვფიქრობ, რომ კარგად გაუძღვება დაკავებულ თანამდებობას“.

შეგახსენებთ, რომ დღეს, 4 მარტს, ადიგენის მუნიციპალიტეტის საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით საკრებულოს თავმჯდომარე ლევან ლობჯანიძე თანამდებობიდან გადააყენეს. დღესვე, დეპუტატებმა საკრებულოს ახალ თავმჯდომარედ, საკრებულოს საფინანსო – საბიუჯეტო, ეკონომიკისა და ქონების მართვის კომისიის თავმჯდომარე, იმედა მღებრიშვილი აირჩიეს.

[მანანა სარაშვილი, ახალციხე]