ლევან ლობჯანიძის იმპიჩმენტი არ შედგა – მომხრეებს ერთი ხმა დააკლდათ

15 ხმით 7–ის წინააღმდეგ, ფარული კენჭისყრით, ადიგენის საკრებულოს დეპუტატებმა, ლევან ლობჯანიძე საკრებულოს თავმჯდომარის პოზიციიდან ვერ გადააყენეს. იმპიჩმენტისთვის 16 ხმა იყო საჭირო, რადგან საკრებულოში 30 დეპუტატია.

რიგგარეშე სხდომა ადიგენში, დღეს, 15 თებერვალს გაიმართა და მასზე მხოლოდ ეს ერთი საკითხი განიხილეს.

სხდომას 25 დეპუტატი ესწრებოდა და კენჭისყრაში მონაწილეობა 24–მა მიიღო, – ერთმა, "ერთიანი ნაციონალური მოძრაობის" წევრმა, რატი ტატალაშვილმა, კენჭისყრაში მონაწილოებისგან თავი შეიკავა.

24 ბიულეტენიდან, 2 გაბათილდა, 22 ხმა კი ასე გადანაწილდა – 15–მა დეპუტატმა ხმა მისცა ლობჯანიძის გადაყენებას, მისი პოზიციაზე დარჩენის მომხრე კი 7 დეპუტატი იყო.

შეგახსენებთ, ლევან ლობჯანიძე ადიგენის საკრებულოს თავმჯდომარეობიდან, პირველად, 2015 წლის 4 მარტს, ასევე იმპიჩმენტის წესით გადააყენეს, –17 ხმით 10–ის წინააღმდეგ. ლობჯანიძემ გადაყენება უკანონოდ მიიჩნია, სასამართლოს გზით იბრძოლა და სამივე ინსტანცია მოიგო.

უზენაესი სასამართლოს გადაწყვეტილების თანახმად, საკრებულო ვალდებული იყო ყოფილი თავმჯდომარე პოზიციაზე აღედგინა და მისთვის 23 თვის იძულებით განაცდური აენაზღაურებინა, რაც 60, 950 ლარს შეადგენს (დარიცხვით). საკრებულომ ლობჯანიძე პოზიციაზე 7 თებერვლის სხდომაზე აღადგინა, თუმცა, მეორე დღესვე საკრებულოში მისი გადაყენების მოთხოვნით ახალი განცხადება შევიდა.

[ლუბა გიორგაძე, ნინო ნარიმანიშვილი, ადიგენი]