‘ნაციონალები’: საკრებულოს თავმჯდომარე კლანურ დაპირისპირებას შეეწირა

ადიგენის ყოფილი გამგებელი, „ერთიანი ნაციონალური მოძრაობის“ ადიგენის რაიონული ორგანიზაციის თავმჯდომარე სიმონ პარუნაშვილი ამბობს, რომ ის რაც ადიგენში მოხდა, შიდა დაპირისპირების დადასტურებაა: „სკამებისთვის ბრძოლის გარდა არაფერს აკეთებენ. მოხდა ის, რომ ლევან ლობჯანიძის კლანს აჯობა იმედა მღებრიშვილის კლანმა, რომელსაც გუბერნატორის მოადგილე ავთანდილ კაჭკაჭაშვილი ხელმძღვანელობს“.

საქართველოს პარლამენტის წევრი, ადიგენის მაჟორიტარი დეპუტატი „ნაციონალური მოძრაობიდან“ ზურაბ ჩილინგარაშვილი ფიქრობს, რომ ლობჯანიძის იმპიჩმენტი უფრო ზედა დონეზე გადაწყდა: „ადიგენის საკრებულოს წევრები „ქართული ოცნებიდან“ ინდიფერენტულები არიან, საკრებულოს თავმჯდომარეს საკუთარი სურვილით ვერ გადააყენებდნენ. დაახლოებით სამ საათში გადაწყდა ეს ამბავი, ზემოდან ჩარევის გარეშე კი ასე წარმატებულად არ განხორციელდებოდა. გუბერნატორის მითითება იყო, მისი მოადგილის, თუ უფრო ზემოდან, ეს თვითონ არკვიონ, ფაქტია, რომ საკრებულოს მუშაობას ვიღაცა აკონტროლებს“.

მისივე თქმით, ლობჯანიძე უბრალოდ შეეწირა ადიგენის ადგილობრივი ხელისუფლების უმოქმედობას: „ადიგენში არაფერი კეთდება. ყველაფერი საკრებულოს თავმჯდომარეს გადააბრალეს და ასე დასაჯეს“.

„ერთიანი ნაციონალური მოძრაობის“ წევრებს ადიგენის მუნიციპალიტეტის საკრებულოს თავმჯდომარის გადაყენების პროცესში მონწილეობა არ მიუღიათ.

როგორც ადიგენის მუნიციპალიტეტის საკრებულოს ყოფილი თავმჯდომარე და ამჟამად, საკრებულოს დეპუტატი „ერთიანი ნაციონალური მოძრაობიდან“, გივი ენდელაძე ამბობს, „ქართული ოცნებას“ სხდომაზე არ დაუსახელებია მიზეზი, რატომ ათავისუფლებდნენ ლობჯანიძეს, ამიტომ მათ კენჭისყრაში მონაწილეობა არ მიიღეს: „ერთადერთი მიზეზი დაასახელეს, თურმე ლევან ლობჯანიძეს არაგუნდური მუშაობის გამო უნდა დაეტოვებინა თანამდებობა. ჩვენ ვფიქრობთ, რომ ეს არ არის რეალური მიზეზი, ამიტომ, კენჭისყრის პროცესში მონაწილეობა არ მივიღეთ, სკამებისთვის ბრძოლაში ჩვენ არ ვმონაწილეობთ“, – ამბობს გივი ენდელაძე.

შეგახსენებთ, რომ 4 მარტს, ადიგენის მუნიციპალიტეტის საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით საკრებულოს თავმჯდომარე ლევან ლობჯანიძე თანამდებობიდან გადააყენეს. იმდღესვე დეპუტატებმა საკრებულოს ახალ თავმჯდომარედ, საკრებულოს საფინანსო – საბიუჯეტო, ეკონომიკისა და ქონების მართვის კომისიის თავმჯდომარე, იმედა მღებრიშვილი აირჩიეს.

ლევან ლობჯანიძემ გუშინვე განაცხადა, რომ მის გათავისუფლებაში რეგიონის პირველი პირები მონაწილეობდნენ. თუმცა, ეს კატეგორიულად უარყვეს სამცხე–ჯავახეთის გუბერნატორმაც და მისმა მოადგილემაც.

[მანანა სარაშვილი, ახალციხე]