ახალგაზრდები ქალაქის დასუფთავებაზე იწყებენ ზრუნვას

თავიანთი იდეების შესახებ ახალგაზრდებმა ახალციხის მერიაში დღეს, 1 მარტს, პრეზენტაცია გამართეს. მეექვსე სკოლის სასკოლო კლუბს იდეა World Vision–ის საგრანტო კონკურსის ფარგლებში გაუჩნდა.

„მცირე დაფინანსებაზეა საუბარი, დაახლოებით 500 ლარის ფარგლებში ფინანსდება პროექტი. მეექვსე სკოლა ერთ–ერთი საპილოტე სკოლაა“, – განმარტავს World Vision–ის სამხარეო განვითარების პროგრამის მენეჯერი ნინო ლომიძე.

პროექტის ფარგლებში მოსწავლეებმა გადაწყვიტეს ახალციხეში ისტორიული უბნის, რაბათის ტერიტორიაზე არსებული ტყის დასუფთავება.
„ამ პროექტში უნდა ჩავრთოთ ახალციხის მეშვიდე საჯარო სკოლის ბავშვები. ისინი დახატავენ ნახატებს და ამ ნახატებით გავმართავთ მსვლელობას ქალაქის ცენტრალურ ქუჩებში, ხალხს მოვუწოდებთ, რომ დაასუფთავონ დანაგვიანებული ადგილები და აღარ დაყარონ ნაგავი ძირს“, – ამბობს სასკოლო კლუბის ერთ–ერთი წევრი ვერიკო ქაფიანიძე.

პროექტის მონაწილეებს იმედი აქვთ, რომ მათი იდეა გაამართლებს და ქალაქის დასუფთავებაზე მოსახლეობაც იზრუნებს. გარდა ამისა, მოსწავლეები აღნიშნულ პროექტში ქალაქის მერიის ჩართულობასაც ელიან.

„დასუფთავებულ ადგილას ვგეგმავთ ტრაფარეტების დადგმას, სადაც საზოგადოების მიმართ მიმართული მესიჯები იქნება“, – ამბობს ვერიკო ქაფიანიძე.

ქალაქის მერიისგან ახალგაზრდები ხელთათმანებითა და ტრანსპორტით დახმარებას ელოდებიან: „იმედი გვაქვს, რომ დაგვეხმარებიან ტრაფარეტების შეძენაშიც“.

ქალაქ ახალციხის მერიაში ამბობენ, რომ ახალგაზრდებს პროექტის განხორციელებაში აუცილებლად დაეხმარებიან.

[თამარ თოთაძე, ახალციხე]