1 ივნისი ახალციხეშიც აღნიშნეს

ახალციხის ციხის ტერიტორიაზე ღონისძიება დილის 11:00 საათზე დაიწყო. მასში ახალციხის მუნიციპალიტეტის სკოლამდელი აღზრდის დაწესებულებების უფროსი ასაკის ბავშვები მონაწილეობდნენ, რომლებმაც სიმღერები, ლექსები და საცეკვაო ნომრები შეასრულეს.

ღონისძიებაში ახალციხის მუნიციპალიტეტის სხვადასხვა სოფლებიდან ჩამოსული სკოლის მოსწავლეები, ადიგენის მუნიციპალიტეტის სოფელ არლის საკვირაო სკოლისა და ახალციხის მეშვიდე საჯარო სკოლის მოსწავლეებიც ჩაერთვნენ. აქვე იყვნენ ახალციხის სამხატვრო სკოლის მოსწავლეებიც.

ღონისძიება ახალციხის მუნიციპალიტეტისა და არასამთავრობო ორგანიზაცია “Worls Vision - საქართველოს” სამცხე-ჯავახეთის განვითარების პროგრამის ორგანიზებით გაიმართა.

”ჩვენი სამიზნე სოფლებიდან სასკოლო კლუბის ბავშვებმა გარკვეული წარმოდგენები მოამზადეს, რომლებიც დღეს შეასრულეს. რაც შეეხება საჩუქრებს, მშობლებისთვისაც და ბავშვებისთვისაც სხვადასხვა თემატიკაზე საინფორმაციო მასალები გვაქვს, რომლებსაც ახალციხის ციხის ტერიტორიაზე მოსულ სტუმრებს დავურიგებთ. გარდა ამისა, სპეციალური სასაჩუქრე პაკეტები გვაქვს, რომელბსაც მხოლოდ უნარშეზღუდული ბავშვები მიიღებენ”, - ამბობს “Worls Vision - საქართველოს” სამცხე-ჯავახეთის პროგრამის მენეჯერი კახა გორდაძე და ამატებს, რომ მათი ტრანსპორტირება სწორედ “Worls Vision - საქართველომ” უზრუნველყო.

ბავშვთა დაცვის საერთაშორისო დღესთან დაკავშირებული ღონისძიება უფასო იყო და მასზე დასწრება ნებისმიერ მსურველს შეეძლო. გარდა ამისა, ახალციხის ციხის ზედა ნაწილის დათვალიერება ყველა ბავშვისთვის თავისუფალი იყო.

”ყველა ბავშვს ვულოცავ ამ ლამაზ დღეს, გაზრდილიყვნენ ჯამრთელები და უფლის წყალობა არ მოკლებოდეთ. დღეს ყველა ბავშვისთვის ზედა ციხის ტერიტორიაზე შესვლა უფასოა”, - ამბობს ახალციხის ციხის დირექტორი გუჯა ბიჭაშვილი.

[თამარ თოთაძე, ახალციხე]