გზამკვლევი ახალციხის ისტორიული შენობების შესახებ

თავიანთი ნამუშევრის პრეზენტაცია ახალგაზრდებმა დღეს, 31 მაისს გამართეს. ამბობენ, რომ ქალაქი მოიარეს, უძველესი შენობების ისტორია შეისწავლეს და მონაცემებს ერთ ნაშრომში მოუყარეს თავი. პროექტში 25 მონაწილე იყო ჩართული.

„საინტერესო იყო მუშაობა. ზოგიერთი შენობის შესახებ ისეთი ინფორმაციაც გავიგე, რაც აქამდე არ ვიცოდი“, - ამბობს პროექტის მონაწილე ანი გოგნაძე.

გზამკვლევი პროექტის „კულტურული მრავალფეროვნებისა და თანაცხოვრების რუკა“ ფარგლებში მომზადდა. პროექტს ტოლერანტობისა და მრავალფეროვნების ინსტიტუტი ახორციელებს.

„ძალიან მნიშვნელოვანია ქალაქის ყველა ღირსშესანიშნაობის შესწავლა და გზამკვლევად გაკეთება, რათა ტურისტებისათვის ადვილად ცნობადი გახდეს. ყველა ახალგაზრდამ მნიშვნელოვნად უნდა წარმოაჩინოს თავისი ქალაქის ტურისტული პოტენციალი“, - ამბობს ტოლერანტობისა და მრავალფეროვნების ინსტიტუტის წარმომადგენელი ბექა მინდიაშვილი.

პროექტი, ქვეყნის მასშტაბით, ჯერ მხოლოდ ახალციხეში განხორციელდა. როგორც ტოლერანტობისა და მრაველფეროვნების ინსტიტუტის წარმომადგენლები ამბობენ, მსგავსი სახის ღონისძიება სხვა ქალაქებშიც არის დაგეგმილი.





[ლუბა გიორგაძე, ახალციხე]