ახალგაზრდებმა მეორე საჯარო სკოლის ტერიტორია დაასუფთავეს

პროექტს, რომელსაც ჩეხური ორგანიზაცია NESEHNUTI აფინანსებს, არასამთავრობო ორგანიზაცია „ქალთა იმედი" ახორციელებს.

„მსგავს აქციებს ჩვენ ძალიან ხშირად ვაწყობთ, ჩვენი სკოლა ისეთ ადგილზეა, რომ მარტო სკოლის მოსწავლეები არ აბინძურებენ. უბრალოდ მოსახლეობის ცნობიერების დონე იქამდე უნდა მივიდეს, რომ ნაგავი ნაგვის ურნაში ჩააგდონ და ძირს არ დაყარონ“, - ამბობს მეორე საჯარო სკოლის დირქეტორი მარინა ზედგინიძე.

პროექტის დირექტორის ნანა იოსელიანის თქმით, მსგავსი პრობლემები ახალციხეში ბევრგან არის. მეორე საჯარო სკოლა სამიზნე ჯგუფად იმიტომ შეირჩა, რომ ამ ტერიტორიაზე ყველაზე მეტი ბავშვი იყრის თავს.

„როდესაც საკანალიზაციო წყალი სკოლის ეზოში მოედინება, ეს უკვე საგანგაშოა. ამასთან დაკავშირებით ჩვენ სამოქალაქო სვლაც გვექნება, რადგან მოსახლეობას მივაწოდოთ ინფორმაცია იმის შესახებ, რომ ბავშვებს აუცილებლად უნდა გავუფრთხილდეთ“, - ამბობს იგი.

აღნიშნულ პროექტში ჩაერთო სამცხე-ჯავახეთის სახელმწიფო სასწავლო უნივერსიტეტის ეკო კლუბიც. გარდა ამისა, დღევანდელ აქციაში მონაწილეობა ადგილობრივი თვითმმართველობის წარმომადგენლებმაც მიიღეს. მოსწავლეებს დასუფთავებაში ახალციხის დასუფთავების სამსახურის წარმომადგენლებიც დაეხმარნენ. მეორე საჯარო სკოლის მიმდებარე ტერიტორიიდან ნარჩენები შპს „კეთილმოწყობის“ მანქანებით გაიტანეს.

პროექტის „გამიფრთხილდი მე, გაუფრთხილდი შენს თავს, გაუფრთხილდი ყველას!“ ფარგლებში ახალციხელ ახალგაზრდებს ტრენინგებიც ჩაუტარდებათ თემაზე: ნაგვის რეციკლირება.

„ერთჯერადი აქცია საკმარისი არ არის, მთავარია მოსახლეობის ცნობიერება ამაღლდეს, ამას უნდა მოვერიოთ, რომ მენტალურად შევიცვალოთ ადამიანები და ჩვენ ბუნებას უნდა გავუფრთხილდეთ“, - ამბობს პროეტის დირექტორი.

აქციას მონიტორინგს უწევდნენ ჩეხეთის ელჩი და იმ ორგანიზაციის წარმომადგენლები, რომლებიც აღნიშნულ პროექტს აფინანსებენ.



[თამარ თოთაძე, ახალციხე]