მოსწავლეებმა სოფელ მუსხში არსებულ პრობლემებზე ისაუბრეს

“World Vizion” საქართველოს „სამხრეო განვითარების პროგრამის“ ფარგლებში ახალციხის მუნიციპალიტეტის სასკოლო კლუბის წევრები პარტნიორ ორგანიზაციასთან „მზიან სახლთან“ ერთად ადვოკატირების პროექტს ახორციელებენ. აღნიშნული პროექტის ფარგლებში მოსწავლეებს ტრენინგი სხვადასხვა თემებზე ჩაუტარდათ.

„პროექტის ფარგლებში ბავშვებმა გამოკითხეს მოსახლეობა, გამოავლინეს მათი პრობლემები, შემდეგ კი პირისპირ შეხვდნენ ადგილობრივი ხელისუფლების წარმომადგენლებს და საკუთარ თემში არსებული პრობლემები წარუდგინეს“, – ამბობს ნინო ლომიძე.

ახალგაზრდებმა სოფელში ორი ძირითადი პრობლემა გამოავლინეს, ეს იყო დასუფთავება და სასმელი წყლის მიწოდება და ხარისხი. როგორც ხელისუფლებასთან შეხვედრის დროს მოსწავლეებმა აღნიშნეს, სოფელში მხოლოდ რამდენიმე ნაგვის ურნა დგას, ადგილობრივ თვითმმართველობას სთხოვეს ნაგვის ურნების დამატება. ასევე მათი თქმით, სოფელში დაიზიანებულია სასმელი წყლის მილი, რის გამოც წყალი ბინძურდება.

ახალგზარდებმა ადგილობრივი ხელისუფლების წარმომადგენლებისგან პირობა მიიღეს, რომ აღნიშნული პრობლემები 2016 წლისთვის აუცილებლად მოგვარდება. თუმცა, ამ სამუშაოების დროს მოსახლეობაც აქტიურად უნდა ჩაერთოს.

ნინო ლომიძის თქმით, აღნიშნული პრობლემების გაცნობის შემდეგ ადგილობრივი თვითმმართველობის წარმომადგენლებთან კიდევ ერთი შეხვედრა შედგება.

„რამდენიმე დღეში მოსწავლეები ისევ შეხვდებიან, სადაც უკვე საბოლოოდ ჩამოაყალიბებენ ვინ რას აკეთებს, ვის რა როლი და პასუხისმგებლობა აკისრია, გაიწერება ვადები და შემდეგ მოხდება ამ სამუშაოების მონიტორინგი“.

[თამარ თოთაძე, ახალციხე]