ადიგენში ავარიული ხიდი დროებით შეაკეთეს

ხიდით, რომელიც პერიოდულად მწყობრიდან გამოდის, ადიგენის მუნიციპალიტეტის 11 სოფელი სარგებლობს. ადგილობრივები განმარტავენ, რომ ბოლო ორი თვის განმავლობაში ხიდზე გასვლა შეუძლებელი იყო, ამიტომ მოსახლეობა შემოვლითი გზით სარგებლობდა.

„დროებით შეაკეთეს. ჩვენმა განცხადებამ შედეგი გამოიღო. გაზაფხულამდე ალბათ გაძლებს და ამბობენ კაპიტალურადაც შეაკეთებენო“, – ამბობს ჭელის მეჩეთის წინამძღვარი ჯამბულ აბულაძე, რომელიც დაზიანებული ხიდის შესახებ ინფორმაციას სოციალური ქსელის საშუალებით ავრცელებდა.

ადიგენის მუნიციპალიტეტის გამგეობაში განმარტავენ, რომ დაზიანებული ხიდი დაახლოებით ერთი თვეა რაც შეაკეთეს და აქ ისევე როგორც ფეხით, გადაადგილება ტრანსპორტითაც უსაფრთხოა.

„ძველი ხიდია და კაპიტალური რეკონსტრუქცია იმის გამო, რომ ბუნებრივი პირობები ამის საშუალებას არ გვაძლევდა, არ ჩატარებია. დროებით არის აღდგენილი და სრული რეაბილიტაცია გაზაფხულისთვის ჩაუტარდება. რამდენი გამოიყოფა რეაბილიტაციისთვის ჯერ გადაწყვეტილი არ არის“, – ამბობს ადიგენის მუნიციპალიტეტის გამგეობის მთავარი სპეციალისტი საორგანიზაციო და საზოგადოებასთან ურთიერთობის საკითხებში მამუკა კალანდაძე.

აღნიშნული ხიდით ჭელის, ჭეჭლას, საირმეს, მოხეს, ციხის უბნის, ზედუბნის, აფიეთის, გორთუბნის, ნამინაურის, დერცელისა და კეხოვანის მოსახლეობა სარგებლობს.



[თინათინ ზაზაძე, ადიგენი]