სოფელ წახანში ავარიული ხიდის რეაბილიტაცია იგეგმება

ადიგენის მუნიციპალიტეტის სოფელ წახანის ხიდით, აღნიშნული სოფლის მაცხოვრებლების გარდა, ქიქინეთისა და ანის მოსახლეობაც სარგებლობს.

"ხვნა–თესვა დაიწყო და მოსახლეობა ამ ხიდით აქტიურად სარგებლობს. 17 მარტს იყვნენ მოსულები გამგეობიდან მოკვლევაზე. დაწერეს რა სჭირდებოდათ“, – ამბობს სოფელ წახანის გამგებლის წარმომადგენელი ნუგზარ კარკაძე.

მისი თქმით, წლების განმავლობაში მოსახლეობა ავარიულ ხიდს საკუთარი ხარჯებით აკეთებს, მაგრამ ახლა კაპიტალური სამუშაოების ჩატარებას საჭიროებს.

ადიგენის მუნიციპალიტეტის გამგეობაში განმარტავენ, რომ ამ ეტაპზე ხარჯთაღრიცხვის შედგენა მიმდინარეობს.

„საღრძისა და წახანის ხიდები ერთდროულად კეთდება. როგორც კი ხარჯთაღრიცხვას გავაკეთებთ, ტენდერიც გამოცხადდება“, – ამბობს ადიგენის მუნიციპალიტეტის ინფრასტრუქტურის სამსახურის უფროსი გოდერძი სხირტლაძე.

[თინათინ ზაზაძე, ადიგენი]