ადიგენში ცხრა სოფელთან დამაკავშირებელი ხიდი ჩანგრეულია

ხიდი, რომელიც რაიონს ცხრა სოფელთან აკავშირებს ისეა ჩანგრეული, რომ როგორც ტრანსპორტით, ასევე ქვეითად მოსიარულეებისთვის სახიფათოა. ამის შესახებ ინფრომაციას სოციალური ქსელის საშუალებით ჭელის მეჩეთის წინამძღვარი ჯამბულ აბულაძე ავრცელებს.

ხიდი, რომ თვეზე მეტია რაც დაზიანდა, ამას ადიგენის მუნიციპალიტეტის გამგეობაშიც გვიდასტურებენ. თუმცა, ამბობენ, რომ აქ საგანგაშო არაფერია: „არსებობს შემოვლითი გზა და ადგილობრივები ამ გზით სარგებლობენ“. მაგრამ როგორც სოციალურ ქსელში აბულაძე წერს, შემოვლითი გზა ავარიულია და თუ ამ გზით არ ისარგებლებ „გავლა ბეწვის ხიდზე მოგიწევს“.

ადიგენის მუნიციპალიტეტის გამგებლის ზაქარია ენდელაძის განცხადებით, ადგილობრივი თვითმმართველობა ამ პრობლემის მოსაგვარებლად უკვე მუშაობს: „ინფრასტრუქტურის სამსახური ხარჯთაღრიცხვას აკეთებეს და სავარაუდო ხარჯთაღრიცხვა შეადგინა კიდეც. უკვე მივმართეთ ექსპერტიზის ბიუროსაც. ხიდი მეფის რუსეთის დროინდელია და ექსპერტების შესწავლას საჭიროებს“.

ენდელაძის განცხადებით, ხიდი გაზაფხულზე შეაკეთეს, თუმცა, ახლა მის კაპიტალურად გაკეთებას გეგმავენ და ამიტომ ეს გარკვეულ დროს საჭიროებს: „კაპიტალურად უნდა გავაკეთოთ, ისე რომ სამომავლოდ ყველა საფრთხე თავიდან ავიცილოთ. ამიტომ ამ ხიდის გაკეთებაზე ტენდერი უნდა გამოცხადდეს და ამას დრო სჭირდება“.

[თამუნა უჩიძე, ახალციხე]