მესამე წელია ადიგენში 11 სოფელთან დამაკავშირებელი ხიდი დაზიანებულია

ხიდი, რომელიც დაბა ადიგენს 11 სოფელთან აკავშირებს და ადგილობრივები, როგორც ფეხით, ისე ტრანსპორტით გადაადგილდებიან, მესამე წელია დაზიანებულია.

ადიგენის მუნიციპალიტეტის გამგეობის ინფრასტრუქტურის სამსახურში აცხადებენ, რომ ხიდი დროებით შეკეთდება და თუ მუნიციპალიტეტი საჭირო თანხებს მოიძებს, კაპიტალურადაც შეაკეთებენ.

„მუნიციპალიტეტში ხიდების რეაბილიტაცია უკვე დაწყებული გვაქვს, რეაბილიტაცია ამ ხიდსაც აუცილებლად ჩაუტარდება, თუმცა როდის მოხდება ეს ზუსტად ვერ გეტყვით“, – ამბობს ადიგენის მუნიციპალიტეტის გამგეობის ინფრასტრუქტურის სამსახურის უფროსი გოდერძი სხირტლაძე.

ხიდი ბოლო სამი წლის განმავლობაში არა ერთხელ დაზიანდა და დროებით შეაკეთეს. ასე იყო 2014 წელსაც. როგორც მაშინ ადიგენის მუნიციპალიტეტის გამგებელმა ზაქარია ენდელაძემ „სამხრეთის კარიბჭესთან“ განაცხადა, ხიდის კაპიტალური შეკეთებისთვის ხარჯთაღრიცხვა დგებოდა. მას შემდეგ სამი წელი გავიდა, თუმცა ხიდი კაპიტალურად ისევ არ გარემონტებულა. ახლა კი ენდელაძე ირმწუნება, რომ ხიდის საფარი ძალიან კარგ მდგომარეობაშია: „ ვიცი ეგ ხიდი, ძალიან კარგად გამოიყურება და კარგი საფარიც გავუკეთეთ“.

შეკითხვამ იმის შესახებ, დათვალა თუ არა ადიგენის გამგეობამ სამი წლის განმავლობაში ხიდის კაპიტალური რემონტისთვის ხარჯები, გამგებელი გააღიზიანა: „მომისმინე აქეთ! კითხვას მისვამ შენ და პასუხს გცემ მე. მე რასაც მინდა იმას გიპასუხებ, მილიონჯერ რეკვა და კითხვების დასმა რა კულტურაა?!“

როგორც ინფრასტრუქტურის სამსახურში გავარკვიეთ, ადიგენის გამგეობაში ავარიული ხიდის კაპიტალური რეაბილიტაციისთვის არც ხარჯთაღრიცხვა შედგენილა და არც პროექტი.

„2010 წლიდან აქ ვმუშაობ და არანაირი ხარჯდააღრიცხვა მაგ ხიდეზე არ გვქონია და არც გვიმუშავია. მე არ ვიცი სამი წლის წინ, თქვენ ვინ რას გეუბნეოდათ. ეს ხიდი ხის მასალით შეკეთდა და კაპიტალურადაც აუცილებლად გავაკეთებთ, ყველაფერს ხომ თავის წესები აქვს“, – აცხადებს გოდერძი სხირტლაძე.

ხიდით ჭელის, ჭეჭლის, საირმეს, მოხეს, ციხის უბნის, ზედუბნის, აფიეთის, გორთუბნის, ნამინაურის, დერცელისა და კეხოვანის მოსახლეობა სარგებლობს. სოფლებს დაბასთან დასაკავშირებლად შემოვლითი გზით სარგებლობა უხდებოდათ.







[ლუბა გიორგაძე, ადიგენი]