რუსთაველის ქუჩაზე ხიდი დროებით შეაკეთეს

რუთაველის ქუჩაზე, ასპინძის ქუჩის ჩასახვევთან მდებარე ხიდი, რომელიც ტროტუარის ფუნქციას ასრულებს, ისე იყო დაზიანებული, რომ მასზე გავლა სახიფათო იყო.

პრობლემაზე "სამხრეთის კარიბჭემ" მასალა ორი დღის წინ, 20 ნოემბერს, მოამზადა. მაშინ ქალაქის მერიაში ამბობდნენ, რომ პრობლემის შესახებ იცოდნენ, თუმცა, როდის შეაკეთებდნენ ხიდს, დაკონკრეტება გაუჭირდათ, იმ მოტივით, რომ ჯერ ტენდერი უნდა გამოცხადებულიყო.

სტუდენტი ალექსანდრე ბერიძე ამბობს, რომ ხიდის საკითხი ახალციხის ბიუჯეტის განხილვისასაც წამოაყენა, თუმცა, როდის შეაკეთებდნენ ზუსტი პასუხი ვერ მიიღო. ამის შემდეგ, დაზიანებული ხიდის ფოტო მერიის ფეისბუქის გვერდზე დადო.

sknews.ge-ს მიერ ინფორმაციის გავრცელებიდან ორი დღის შემდეგ კი, მერიამ ხიდი სახელდახელოდ შეაკეთა, ისე, რომ მასზე გავლა საშიში აღარაა.

ტენდერის დასრულების შემდეგ კი ხიდი კაპიტალურად შეკეთდება.

სტატიაში გამოყენებულია ალექსანდრე ბერიძის ფოტო.

[თამარ თოთაძე, ახალციხე]