ხიდი, რომლის ხარჯთაღრიცხვასაც ადიგენის გამგეობა სამი თვეა ადგენს

11 სოფელთან დამაკავშირებელი ხიდი, რომელიც მწყობრიდან პერიოდულად გამოდის და სახიფათოა, გასული წლის ბოლოს გამგეობამ დროებით შეაკეთა. 2014 წლის 19 დეკემბერს, ადიგენის მუნიციპალიტეტის გამგებელმა ზაქარია ენდელაძემ „სამხრეთის კარიბჭესთან“ განაცხადა, რომ ხიდის ხარჯთაღრიცხვას აკეთებდნენ, თუმცა დასასრულებელი ჰქონდათ. მას შემდეგ სამი თვე გავიდა და გამგეობაში ჯერ კიდევ არ იციან, ხიდის კაპიტალური შეკეთებისთვის რა თანხა სჭირდებათ.

„ამ ხიდთან დაკავშირებით საბოლოო ხარჯთაღრიცხვა ჯერ კიდევ არ გვაქვს. მთავარი ისაა, რომ ადამიანები ამ ხიდით ჩვეულებრივ სარგებლობენ“, – აცხადებს ენდელაძე.

კითხვაზე, რატომ გახდა პრობლემა სამი თვის განმავლობაში ერთი ხიდის ხარჯთაღრიცხვის დათვლა, ენდელაძე კითხვითვე გვპასუხობს: „თქვენთვის რატომაა ეს ასე მნიშვნელოვანი მე ეგ მაინტერესებს. მე თქვენზე მეტად ვარ დაინტერესებული ამ საკითხით“.

ასევე კითხვაზე, თუ დაინტერესებულია, მაშინ აქამდე რატომ არ დაითვალეს, აცხადებს: „ხიდი გადაადგილებას არ აფერხებს და შეგნებულად არ მინდა თანხა დავასახელო, რომ მერე ამას კუდები არ გამოებას“.

ენდელაძის თქმით, ამ ხიდის კაპიტალური შეკეთებისთვის თანხის გამოყოფა ცენტრალურ ხელისუფლებას სთხოვეს, თუმცა, უარი მიიღეს. ამიტომ ახლა მის გარემონტებას საკუთარი სახსრებით ეცდებიან.

„2014 წელში მუნიციპალიტეტში ერთი ხიდი კაპიტალურად შერემონტდა მეორე კი სულ ახალი გაკეთდა. მიმდინარე წლის განმავლობაში ამ ხიდსაც გავაკეთებთ“, – ამბობს ენდელაძე.

[თამუნა უჩიძე, ადიგენი]