ადიგენში საბავშვო ბაღი ოფიციალურად გაიხსნა

გახსნის ცერემონიას რეგიონის პირველი პირები და ადიგენის მუნიციპალიტეტის ხელმძღვანელები დაესწრნენ.

ადიგენში საბავშვო ბაღის მშენებლობა მას შემდეგ დაიწყო, რაც დაბაში მდებარე ძველი ბაღის შენობა ჩამოინგრა. ბაღის მშენებლობა ადიგენის ბიუჯეტიდან 201.000 ლარით დაფინანსდა. სამშენებლო სამუშაოები ტენდერში გამარჯვებულმა „ჯი–თი–აიმ“ შესარულა.
მეორე ეტაპზე ბაგა–ბაღის ინვენტარით აღჭურვა იგეგმება. კეთილმოეწყობა ეზოც.

„რაც გადასახალისებელი იქნება, ახალს შევიძენთ. საჭიროა ეზოს მოწყობა, დაიდგმება საბავშვო კარუსელები და სასრიალოები. დაითვლება რა დაჯდება ინვენტარის შეძენა და ამის შემდეგ გამოცხადდება ტენდერი“, – ამბობს სამცხე–ჯავახეთის გუბერნატორი აკაკი მაჭუტაძე.
ახალ შენობაში სწავლა 73 აღსაზრდელმა 26 იანვარს დაიწყო. ბაღში ორი ჯგუფი გაიხსნა 3–დან 5–წლამდე აღსაზრდელებისთვის. სკოლამდელი აღზრდის დაწესებულებაში 12 თანამშრომელია დასაქმებული.

შეგახსენებთ, რომ დაბა ადიგენში საბავშვო ბაღის შენობა 2013 წლის 26 დეკემბერს ჩამოინგრა. შემთხვევას მსხვერპლი არ მოჰყოლია. 77 აღსაზრდელი საბავშვო ბაღის გარეშე დარჩა. თითქმის ორთვიანი ლოდინის შემდეგ საბავშვო ბაღი, დროებით, ზაზაშვილის N5 – ში, ორსართულიანი კერძო სახლის მეორე სართულზე გაიხსნა. ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდიდა.

ადიგენის მუნიციპალიტეტში 8 ბაღია, სადაც 391 აღსაზრდელი სწავლობს. გაერთიანებული ბაღების დირექტორი მარინე ვარდიძე ამბობს, რომ მსურველები კიდევ ბევრია, თუმცა, რადგან ახალი ჯგუფების გასახსნელად სარემონტო სამოშაოებია ჩასატარებელი. ჯერ მათ მიღებას ვერ შეძლებენ.

„აბასთუმანსა და ვარხანში თითო ჯგუფი დავამატეთ. გამგებელი გვპირდება დახმარებას და ეს საკითხი უახლოეს მომავალში მოგვარდება“, – ამბობს იგი.





[თინათინ ზაზაძე, ადიგენი]