ადიგენში საბავშვო ბაღი კერძო სახლში გაიხსნება

როგორც ადიგენის ადგილობრივ თვითმმართველობაში აცხადებენ, საბავშვო ბაღი დროებით ზაზაშვილის ქუჩაზე მდებარე ორსართულიან კერძო სახლში იხსნება. ადგილობრივმა ხელისუფლებამ შენობა უკვე დაათვალიერა.

„ფართი საკმარისია, მოწესრიგებულია სველი წერტილებიც, სახლს აქვს ეზოც. ბინას ჯანდაცვის სამსახურიც დაათვალიერებს და იქ არსებული პირობების შესახებ წერილობით გვაცნობებს“, - ამბობს ადიგენის მუნიციპალიტეტის საკრებულოს თავმჯდომარე გივი ენდელაძე.

ადიგენის ადგილობრივ თვითმმართველობას საბავშვო ბაღისთვის ყოველთვიურად ქირის, 800 ლარის გადახდა მოუწევს. „მეპატრონე ხელზე 600 ლარს აიღებს“, - ამბობს ენდელაძე.

მისი თქმით, სასწავლო პროცესი ოფიციალური დოკუმენტების მოწესრიგების შემდეგ, მალევე დაიწყება, თუმცა დაბაში ახალი საბავშვო ბაღის აშენების საკითხი კვლავ დღის წესრიგში რჩება: „სანამ მე ვიქნები ხელისუფლებაში, მაქსიმალურად ვეცდები, რომ ბაღის მშენებლობას საფუძველი მაინც ჩავუყარო. ადიგენში ახალი საბავშვო ბაღი აუცილებად უნდა აშენდეს“.

შეგახსენებთ, ადიგენში საბავშვო ბაღის შენობა 26 დეკემბერს ჩამოინგრა. შემთხვევას მსხვერპლი არ მოჰყოლია. ამ დრომდე 77 აღსაზრდელი საბავშვო ბაღის გარეშეა დარჩენლი. ექსპერტიზის დასკვნით, შენობის მდგომარეობა არადამაკმაყოფილებელია და მისი აღდგენა დაუშვებელია.

[თამუნა უჩიძე, ადიგენი]