ადიგენში დანგრეული საბავშვო ბაღის სანაცვლოდ ახალი ბაღი შენდება

საბავშვო ბაღის მშენებლობისთვის ტენდერი 10 ივლისს გამოცხადდა და 1 აგვისტოს დასრულდა. შენობას შპს „ჯი –აი – თი“ აშენებს. მშენებლობისთვის 201.101 ლარია გამოყოფილი.

ახალი საბავშვო ბაღის მშენებლობა 25 აგვისტოს დაიწყო. სამუშაოების 20 პროცენტი უკვე შესრულებულია.

„საბავშვო ბაღი ისევ ძველი ბაღის ტერიტორიაზე შენდება. თუ ამინდებმა შეგვიწყო ხელი, სულ მალე ადიგენში ორ ჯგუფზე გათვლილი, თანამედროვე სტანდარტების ბაღი იქნება “, – ამბობს ადიგენის მუნიციპალიტეტის გამგეობის შესყიდვების სამსახურის მთავარი სპეციალისტი თეა ბოჩიკაშვილი.

სატენდერო დოკუმენტაციის თანახმად, შპს „ჯი – აი – თი“–მ ახალი საბავშვო ბაღის მშენებლობა 5 დეკემბერს უნდა დაამთავროს.

შეგახსენებთ, რომ დაბა ადიგენში საბავშვო ბაღის შენობა გასული წლის 26 დეკემბერს ჩამოინგრა. შემთხვევას მსხვერპლი არ მოჰყოლია. 77 აღსაზრდელი საბავშვო ბაღის გარეშე დარჩა. თითქმის ორთვიანი ლოდინის შემდეგ საბავშვო ბაღი, დროებით, ზაზაშვილის N5 – ში, ორსართულიან კერძო სახლის მეორე სართულზე გაიხსნა. ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდის. მესაკუთრესთან ხელშეკრულება წლის ბოლომდეა დადებული.

[მანანა სარაშვილი, ადიგენი]