ადიგენში საბავშვო ბაღის მშენებლობა დათქმულ ვადაში ვერ სრულდება

შპს „ჯი–აი–თი“ –მ, რომელიც დაბა ადიგენში საბავშვო ბაღს აშენებს, კლიმატური პირობების გამო მშენებლობა ხეშეკრულებით გათვალისწინებულ ვადაში ვერ დაასრულა, თუმცა, ამ ფაქტს გაუგებრობები ან ჯარიმა არ მოჰყოლია. ადიგენის გამგეობაში აცხადებენ, რომ მშენებლებს ხელი ყინვებმა შეუშალა, ამიტომ, მშენებლობის ვადა გაუხანგრძლივეს.

ადიგენის მუნიციპალიტეტის გამგებლის ზაქარია ენდელაძის თქმით, კომპანიამ საბავშვო ბაღის მშენებლობა 20 დეკემბერს უნდა დაასრულოს: „ძლიერი ყინვების გამო მშენებელმა კომპანიამ საბავშვო ბაღის მშენებლობა ვერ დაასრულა, ამიტომ ვადა გაუხანგრძლივეთ. მშენებლობა დეკემბრის ბოლოს დასრულდება“.

შეგახსენებთ, რომ დაბა ადიგენში საბავშვო ბაღის შენობა გასული წლის 26 დეკემბერს ჩამოინგრა. შემთხვევას მსხვერპლი არ მოჰყოლია. 77 აღსაზრდელი საბავშვო ბაღის გარეშე დარჩა. თითქმის ორთვიანი ლოდინის შემდეგ საბავშვო ბაღი, დროებით, ზაზაშვილის N5 – ში, ორსართულიან კერძო სახლის მეორე სართულზე გაიხსნა. ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდის. მესაკუთრესთან ხელშეკრულება წლის ბოლომდეა დადებული.

[მანანა სარაშვილი, ადიგენი]