ადიგენში საბავშვო ბაღისთვის ფართი იქირავეს

საბავშვო ბაღი ზაზაშვილის N5-ში, ორსართულაინ კერძო სახლის მეორე სართულზე გაიხსნა. შენობის სავარაუდო ფართი 135 კვადრატული მეტრია.

ამ ეტაპზე ბაღში ორი ჯგუფია და ჯამში 50 აღსაზრდელი დადის. სიით კი აღნიშნულ ბაღში 70-მდე აღსაზრდელი ირიცხება. როგორც ბაღის აღმზრდელები გვიხსნიან, ბავშვები სამ ოთახში არიან განაწილებული. უფროსი ასაკის ჯგუფი შედარებით დიდ ოთახში შეიყვანეს, პატარები კი სახლის პატარა ოთახებში მოათავსეს.

„ფართი ასე თუ ისე საკმარისია, მოწესრიგებულია სველი წერტილებიც. არის რაღაცეები გასაკეთებელი, მაგალითად ხელსაბანია ცოტა მაღალი და ისე უნდა გავაკეთოთ, რომ ბავშვი მიწვდეს. ნელ-ნელა ყველაფერს სტანდარტებამდე მივიყვანთ“,- ამბობს ადიგენის სკოლამდელი აღზრდის დაწესებულების დირექტორი ნატო სინაურიძე.

ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდის. (600 ლარი ხელზე ასაღები ქირის ოდენობაა).

მესაკუთრესთან ხელშეკრულება მიმდინარე წლის დეკემბრის ბოლომდეა დადებული. ადიგენის თვითმართველობაში განმარტავენ, რომ საბავშვო ბაღის აშენების საკითხი კვლავ დღის წესრიგში რჩება.

„ადიგენში აუცილებლად აშენდება ახალი საბავშვო ბაღი“, - ამბობს ადიგენის მუნიციპალიტეტის გამგებლოს მოადგილე არსენ ბალახაშვილი.

შეგახსენებთ, რომ ადიგენში საბავშვო ბაღის შენობა 26 დეკემბერს ჩამოინგრა. შემთხვევას მსხვერპლი არ მოჰყოლია. ექსპერტიზის დასკვნით, შენობის მდგომარეობა არადამაკმაყოფილებელია და მისი აღდგენა დაუშვებელია.

[მანანა სარაშვილი, ადიგენი]