დაბა ადიგენში საბავშვო ბაღის მშენებლობა დასრულდა

პატარები ახალ საბავშვო ბაღში გუშინ, 26 იანვარს გადაიყვანეს. ადიგენის მუნიციპალიტეტის გამგებელი ზაქარია ენდელაძე ამბობს, რომ ახალ შენობაში ყველაფერი თანამედროვე სტანდარტების შესაბამისად გაკეთდა.

„ბავშვები ახალ საბავშვო ბაღში უკვე გადავიყვანეთ, როგორც ვიცი 80 აღსაზრდელია და ორ ჯგუფად არიან გაყოფილი. რამდენიმე დღეში ვაპირებ მისვლას და ყველაფერს ადგილზე ვნახავ“, – ამბობს გამგებელი.

შეგახსენებთ, რომ დაბა ადიგენში საბავშვო ბაღის შენობა 2013 წლის 26 დეკემბერს ჩამოინგრა. შემთხვევას მსხვერპლი არ მოჰყოლია. 77 აღსაზრდელი საბავშვო ბაღის გარეშე დარჩა. თითქმის ორთვიანი ლოდინის შემდეგ საბავშვო ბაღი, დროებით, ზაზაშვილის N5 – ში, ორსართულიანი კერძო სახლის მეორე სართულზე გაიხსნა. ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდიდა.

[მანანა სარაშვილი, ადიგენი]