ადიგენში საბავშვო ბაღის მშენებლობა სრულდება

ადიგენში საბავშვო ბაღის მშენებლობის პროცესი დღეს, 26 ნოემბერს ადიგენის მუნიციპალიტეტის გამგებელმა ზაქარია ენდელაძემ დაათვალიერა.
ენდელაძის თქმით, სამუშაოების 80 პროცენტი უკვე შესრულებულია: „მშენებელი კომპანია 24 საათიან რეჟიმში მუშაობს. შენობა უკვე დახურულია, ამ ეტაპზე მიმადინერეობს შიდა მოსაპირკეთებელი სამუშაოები“.

სატენდერო დოკუმენტაციის თანახმად, მშენებელმა კომპანიამ საბავშვო ბაღის მშენებლობა 5 დეკემბრამდე უნდა დაასრულოს.

შეგახსენებთ, რომ დაბა ადიგენში საბავშვო ბაღის შენობა გასული წლის 26 დეკემბერს ჩამოინგრა. შემთხვევას მსხვერპლი არ მოჰყოლია. 80 – მდე აღსაზრდელი საბავშვო ბაღის გარეშე დარჩა. თითქმის ორთვიანი ლოდინის შემდეგ საბავშვო ბაღი, დროებით, ზაზაშვილის N5 – ში, ორსართულიან კერძო სახლის მეორე სართულზე გაიხსნა. ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდის.

მიმდინარე წლის 25 აგვისტოს კი დანგრეული საბავშვო ბაღის ადგილზე, თ. ერისთავის ქუჩაზე ახალი საბავშვო ბაღის მშენებლობა დაიწყო. მშენებლობისთვის ტენდერი 10 ივლისს გამოცხადდა და 1 აგვისტოს დასრულდა. შენობას შპს „ჯი –აი – თი“ აშენებს.

ბაღის მშენებლობისთვის ადგილობრივ ბიუჯეტიდან 201 ათასი ლარი გამოიყო.

[მანანა სარაშვილი, ადიგენი]