წლის ბოლოს დაბა ადიგენს ახალი საბავშვო ბაღი ექნება

როგორც ადიგენის მუნიციპალიტეტის გამგეობაში განმარტავენ საბავშვო ბაღის მშენებლობისთვის ტენდერი რამდენიმე დღეში გამოცხადდება.

„პროექტი უკვე მზად არის, ხვალ ან ზეგ უკვე ტენდერსაც გამოვაცხადებთ, 20 დღეში გამარჯვებული გამოვლინდება და სავარაუდოდ ერთ თვეში უკვე სამუშაოები დაიწყება“,–ამბობს ადიგენის მუნიციპალიტეტის გამგებელი ზაქარია ენდელაძე.

ენდელაძის თქმით, ტენდერი 225 ათასი ლარის ფარგლებში გამოცხადდება. ახალი საბავშვო ბაღი ძველი ბაღის ტერიტორიაზე აშენდება.

„მოგეხსენებათ, რომ ძველი ბაღი ავარიულ მდგომარეობაშია, ამიტომ ბავშვების დასაცავად ძველ ბაღსა და ახალს შორის გამყოფი კედელი გაკეთდება“,–ამბობს ენდელაძე და ამატებს, რომ წლის ბოლოს ადიგენს ორ ჯგუფზე გათვლილი, თანამედროვე სტანდარტების საბავშვო ბაღი ექნება.

შეგახსენებთ, რომ დაბა ადიგენში საბავშვო ბაღის შენობა გასული წლის 26 დეკემბერს ჩამოინგრა. შემთხვევას მსხვერპლი არ მოჰყოლია. 77 აღსაზრდელი საბავშვო ბაღის გარეშე დარჩა. ორთვიანი ლოდინის შემდეგ სასწავლო პროცესი 4 მარტს განახლდა.

საბავშვო ბაღი,დროებით, ზაზაშვილის N5 – ში, ორსართულიან კერძო სახლის მეორე სართულზე გაიხსნა. ადიგენის ადგილობრივი თვითმმართველობა შენობის მეპატრონეს ყოველთვიურად 600 ლარს უხდის. მესაკუთრესთან ხელშეკრულება წლის ბოლომდეა დადებული.

[მანანა სარაშვილი, ადიგენი]