5–საათიანი სასამართლო და ჯარიმა 250 ლარი

ადიგენის მუნიციპალიტეტის სოფელ მოხეში 22 ოქტომბერს დაკავებული 14 მუსლიმიდან, 11–ს საქმე ახალციხის რაიონულმა საამართლომ განიხილა. სასამართლო პროცესი 19:00 საათზე დაიწყო და 00:20 საათზე დასრულდა. პროცესი ორჯერ შესვენების გამო შეწყდა, ერთხელ კი ერთ–ერთმა დაკავებულმა განაცხადა, რომ ცუდად იყო და ჰაერზე გაყვანა ითხოვა. სასამართლო პროცესზე ოთხი პოლიციელი და ხუთი მუსლიმი დაკითხეს.
ადიგენის რაიონული პოლიციის თანამშრომლის რამაზ ნადირაძის თქმით, ადგილობრივი მუსლიმები სამართალდამცავებს სიტყვიერ შეურაცხყოფას აყენებდნენ, თუმცა ფიზიკური დაპირიპირება არ ყოფილა.

„22 ოქტომბერს ტენდერში გამარჯვებული კომპანიის წარმომადგენელმა ზურა ტაბიძემ მოგვმართა, რის შედეგადაც ავედით სოფელ მოხეში. ადგილობრივი მუსლიმები უცენზურო სიტვებით მოგვმართავდნენ, ხელით გვაწვებოდნენ და უნდოდათ მუშების გაძევება. ჩვენ მათ წესრიგის დაცვისკენ მოვუწოდებდით“, – განაცხადა სასამართლო პროცესზე რამაზ ნადირაძემ.

მუსლიმებმა კი განაცხადეს, რომ აგრესია სამართალდამცველებისგან მოდიოდა.
„დერცელიდან ჩავედით მოხეში, ავტობუსიდან გადმოვედით თუ არა, დაგვესივნენ და მანქანებში ჩაგვტენეს“, – განაცხადა წალკაში მცხოვრებმა თამაზ მიქელაძემ, რომელმაც აღნიშნა, რომ გუშინ დერცელში სტუმრად იმყოფებოდა.

11–ვე დაკავებულს მოსამართლემ ჯარიმა 250 ლარი დააკისრა. თანხის გადასახდელად მათ ერთკვირიანი ვადა აქვთ.

დაკავებულებს საიას გორის ოფისის იურისტები ნონა ასკილაშვილი და დალი ჯანიაშვილი იცავდნენ.
ისინი ამბობენ, რომ მათი დაცვის ქვეშ მყოფებს დანაშაული არ ჩაუდენიათ და შესაბამისად, არაფერი უღიარებიათ.

„სასამართლო პროცესზე მოწმეთა მტკიცებულებებით შეიძლება ითქვას, დადასტურდა, რომ დაკავებულების მხრიდან ადმინისტრაციული სამართალდარღვევის ჩადენას ადგილი არ ჰქონია. თუმცა, სასამართლომ ისინი დააჯარიმა 250 ლარით და გაათავისუფლა დარბაზიდან“, – ამბობს დალი ჯანიაშვილი.

დაკავებულები ამბობენ, რომ სასამართლომ ჯარიმა დაუმსახურებლად დააკისრათ.

„100–ლარიანი რომ ყოფილიყო, კიდევ შევძლებდით გადახდას, მაგრამ ისიც არ გვეკუთვნოდა“, – გვითხრა მოხეში მცხოვრებმა ბადრი გობაძემ.

სასამართლოს გადაწყვეტილებით უკმაყოფილოა ჯამბულ ნაკაიძეც: "უდანაშაულოდ დამიჭირეს. ვერ გადავიხდი 250 ლარს. ერთი წლის განმავლობაში ვერ ვახერხებ მაგ თანხის შოვნას".

გათავისუფლებულები ამბობენ, რომ სასამართლოს გადაწყვეტილების გასაჩივრებას არ აპირებენ. 11–ვე მუსლიმი სასამართლოდან აქციაზე გაემართა. მათი მისვლის შემდეგ, მუსლიმებმა აქციის შეწყევტა გადაწყვიტეს.

შეგახსენებთ, სამართალდამცველებმა მუსლიმები გუშინ, 22 ოქტომბერს, მოხეში, მეჩეთის შენობის გამო ადგილობრივებსა და სამართალდამცველებს შორის მომხდარი დაპირისპირებისას დააკავეს. მათი დაკავების გამო ადიგენის მუსლიმური თემი ორი დღის განმავლობაში ახალციხეში, შსს სამხარეო სამმართველოს შენობასთან აქციებს მართავდა.

[თინათინ ზაზაძე, ახალციხე]