მუსლიმები მოხეში აქციის გამართვას არ გეგმავენ

ადიგენის მუნიციპალიტეტის სოფელ მოხეში სიმშვიდეა. მუსლიმები აქციის გამართვას არ გეგმავენ. როგორც მოხეში მცხოვრები ოთარ მიქელაძე ამბობს სოფელში სპეციალური კომისიის გადაწყვეტილებას ელოდებიან.

"სპეციალური კომისია გადაწყვეტს რა და როგორ იქნება. ჩვენც კომისიის პასუხს ველოდებით, მანამდე აქციის გამართვას არ ვგეგმავთ" , – ამბობს ოთარ მიქელაძე და ამატებს, რომ დღეს სოფელში ტენდერში გამარჯვებული კომპანიის მუშახელი არ გამოჩენილა.

ტენდერში გამარჯვებული კომპანიის წარმომადგენლის ზურაბ ტაბიძის თქმით მოხეში ბიბლიოთეკის მშენებლობა 26 ოქტომბერს განახლდება.

"დღეს და ხვალ ვისვენებთ რადგან ამ ორ დღეში ერთი კვირის საქმე გავაკეთეთ. სამშენებლო სამუშაოებს სავარაუდოდ კვირას განვაახლებთ", – ამბობს ზურაბ ტაბიძე.

შეგახსენებთ, რომ ახალციხეში, შსს სამხარეო მთავარ სამმართველოსთან შეკრებილი მუსლიმები მას შემდეგ დაიშალლნენ რაც ახალციხის რაიონულმა სასამართლომ, 22 ოქტომბერს, სოფელ მოხეში დაკავებული 14 მუსლიმი გაათავისუფლა.

14–დან 11–ს ახალციხის რაიონულმა სასამართლომ ადმინისტრაციული ჯარიმა, 250 ლარი დააკისრა, 3 სასამართლოს გარეშე გაათავისუფლეს, თუმცა, მათ საქმეზე ძიება გრძელდება.

[მანანა სარაშვილი, თამარ თოთაძე, ახალციხე]