მოხეში მომხდარი მოვლენები Human Rights Watch–ის ანგარიშში მოხვდა

მოხეში მომხდარი მოვლენები ორგანიზაციის მსოფლიო ანგარიშში მოხვდა. Human Rights Watch–ის ერთწლიან ანგარიშში ნათქვამია, რომ „ოქტომბერში პოლიციამ არაპროპორციული ძალა გამოიყენა პატარა სოფელში საპროტესტო გამოსვლის დასაშლელად და დააკავა 14 მონაწილე”.

„სასამართლომ 11 მათგანი დააჯარიმა 250 ლარით წვრილმანი ხულიგნობისთვის და პოლიციისთვის წინააღმდეგობის გაწევისთვის. პოლიციის ქმედებები არ იქნა სათანადოდ გამოძიებული ხელისუფლების მიერ“, – ვკითხულობთ ანგარიშში.

შეგახსენებთ, სოფელ მოხეში ადგილობრივი მუსლიმები და ქრისტიანები სოფლის ცენტრში მდებარე შენობაზე დავობენ. მუსლიმები აცხადებენ, რომ შენობა, რომელიც ერთ დროს მეჩეთი იყო, მათ უნდა გადაეცეთ. მათ ადიგენის გამგეობაში შენობის გადაცემის მოთხოვნით განცხადებაც შეიტანეს. თუმცა, გამგეობაში ამბობენ, რომ შენობას კულტურის სახლის სტატუსი აქვს და მასში ბიბლიოთეკის მოწყობა გადაწყვიტეს.

მოხეში ვითარება შენობის სარეაბილიტაციო სამუშაოებმა დაძაბა. 22 ოქტომბერს, შენობის დემონტაჟს, რომელიც პოლიციის ცოცხალი ჯაჭვის ფონზე მიმდინარეობდა, მუსლიმებსა და სამართალდამცველებს შორის დაპირისპირება მოჰყვა. პოლიცამ 14 მუსლიმი დააკავა.

14–დან 11 მუსლიმი ადმინისტრაციულ სამართალდარღვევათა კოდექსის 166–ე და 173–ე მუხლებით დააკავეს, რაც გულისხმობს წვრილმან ხულიგნობასა და პოლიციის მუშაკისთვის წინააღმდეგობის გაწევას. სამი პირი კი სისხლის სამართლის კოდექსის 353–ე მუხლით, რაც ასევე პოლიციის მუშაკისთვის წინააღმდეგობის გაწევას გულისხმობს და ისჯება ჯარიმით ან 2–დან 5 წლამდე თავისუფლების აღკვეთით.

23 ოქტომბერს, ახალციხის რაიონულმა სასამართლომ, მოხეში დაკავებული 14 მუსლიმიდან, იმ 11–ს, რომელთა მიმართაც საქმე ადმინისტრაციული წესით იყო აღძრული, 250 ლარი ჯარიმა დააკისრა. ის სამი დაკავებული კი, რომელთა მიმართ საქმე სისხლის სამართლის კოდექსის 353-ე მუხლის მე-2 ნაწილით იყო აღძრული, ბორჯომის სასამართლომ ბრალის წარდგენის საფუძვლის არარსებობის გამო გაათავისუფლა.

[ნინო ნარიმანიშვილი, ახალციხე]