მოხეში მცხოვრები ქრისტიანები სადავო შენობაში ბიბლიოთეკის განთავსებას ითხოვენ

15-მდე ქრისტიანი გუშინ, 22 ოქტომბერს, 20:00 საათზე სამცხე-ჯავახეთის გუბერნიაში გუბენატორს აკაკი მაჭუტაძეს შეხვდა. ადგილობრივებმა რეგიონის პირველ პირს სადავო შენობაში კვლავ სამშენებლო სამუშაოების გაგრძელება სთხოვეს.

„დააფიქსირეს თავიანთი პოზიცია, რომ არ უნდათ იქ სამშენებლო პროცესი შეჩერდეს“, - აცხადებენ გუბერნიაში.

როგორც ქრისტიანები აცხადებენ, გუბერნატორმა მათ დაუდასტურა, რომ აქ ისევ ბიბლიოთეკა გაკეთდება.

ქრისტიანები აცხადებენ, რომ მოხეში მდებარე ყოფილი მეჩეთი, ქრისტიანული ტაძრის ქვებითაა აშენებული და არ უნდა დაუშვან, რომ ის შენობა მუსლიმებს გადასცენ, მაშინ როცა მათ სოფელში უკვე აქვთ სალოცავი.

შეგახსენებთ, რომ გუშინ, 22 ოქტომბერს, სოფელ მოხეში მუსლიმებმა ძველი მეჩეთის შენობაში ბიბლიოთეკის გახსნის სამუშაოები გააპროტესტეს, რასაც სამართალდამცავებთან დაპირისპირება მოჰყვა. დაკავებულია 14 მუსლიმი.



[თამუნა უჩიძე, ახალციხე]