მუსლიმების პროტესტის გამო მოხეში ნაწილობრივ, სამ სხვა სოფელში კი სწავლა სრულად შეფერხდა

სამივე სოფელში სწავლა ადიგენის მუნიციპალიტეტის სოფელ მოხეში მომხდარის გამო შეფერხდა.

ადიგენის სოფლებში სასწავლო პროცესის შეფერხებაზე საქართველოს განათლების მინისტრმა, თამარ სანიკიძემ, მთავრობის სხდომის დასრულების შემდეგ, ჟურნალისტებთან ისაუბრა. სანიკიძემ ჟურნალისტებს განუმარტა, რომ სწავლა არა მოხეში, არამედ სამ მიმდებარე სოფელში შეფერხდა, "სადაც მცხოვრებთა ინტერესებს წარმოადგენდა სამლოცველოს თემა".

„სამხრეთის კარიბჭემ“ ინფორმაცია განათლების სამინისტროში გადაამოწმა.

"მოხეში სასწავლო პროცესი ნაწილობრივ მიმდინარეობს, რადგან ქრისტიანი ბავშვები ესწრებიან საგაკვეთილო პროცესს. განათლებისა და მეცნიერების სამინისტრო მოუწოდებს მშობლებს არ გამოიყენონ პროტესტის იარაღად ბავშვები და ნუ შეუზღუდავენ მათ განათლების მიღების საშუალებას", – გვითხრა საქართველოს განათლებისა და მეცნიერების სამინისტროს საზოგადოებასთან ურთიერთობის დეპარტამენტის უფროსმა ნატა ასათიანმა.

მოხეში სასწავლო პროცესი რომ არ შეფერხებულა, ამის შესახებ „სამხრეთის კარიბჭე“ უკვე წერდა. შეგახსნებთ, რომ ადიგენის მუნიციპალიტეტის სოფელ მოხის საჯარო სკოლის 194 მოსწავლიდან გაკვეთილებს მხოლოდ 20, ქრისტიანი მოსწავლე დაესწრო.

შეგახსენებთ, რომ გუშინ, 22 ოქტომბერს, სოფელ მოხეში მუსლიმებმა ძველი მეჩეთის შენობაში ბიბლიოთეკის გახსნის სამუშაოები გააპროტესტეს, რასაც სამართალდამცავებთან დაპირისპირება მოჰყვა. დაკავებულია 14 მუსლიმი. მეორე დღეა მუსლიმები სამხარეო სამმართველოსთან აქციებს მართავენ, დაკავებულების გათავისუფლებას და შენობის გადაცემას ითხოვენ.

[თამარ თოთაძე, ახალციხე]