მოხეში მცხოვრებმა მუსლიმებმა პროტესტის ნიშნად შვილები სკოლაში არ გაუშვეს

მიუხედავად იმისა, რომ სკოლის მოსწავლეების უმეტესობა გაკვეთილებს არ ესწრება, სკოლის ადმინისტრაციაში აცხადებენ, რომ გაკვეთილები ჩვეულებრივად ტარდება.

"ვინც მოვიდა სკოლაში მათთვის ჩვეულებრივად ტარდება გაკვეთილები. თუმცა ძალიან ცოტა ბავშვია. 194 მოსწავლიდან გაკვეთილებს 20 მოსწავლე ესწრება. იურიდიულ ჩარჩოში რა მოვალეობაც მაკისრია, დავუკავშირდი რესურსცენტრს და ყველაფერს ვიღონებთ, რომ სასწავლო პროცესი არ შეფერხდეს. მშობლებთან ვცდილობ გავარკვიო რატომ არ ესწრებიან ბავშვები გაკვეთილებს", – ამბობს მოხის სკოლის დირექტორი თემურ ბერიძე.

ადიგენის სოფლებში მცხოვრები მუსლიმი მოსახლეობა მოხეში დაკავებულების გათავისუფლებას ითხოვს. მუსლიმები დაკავებულების გათავისუფლების მოთხოვნით სამცხე–ჯავახეთის სამხარეო სამმართველოსთან მთელი ღამის განმავლობაში მართავდნენ აქციას.

"ადიგენის ზედა ზონის სკოლებში პროტესტის ნიშნად მუსლიმი მოსწავლეები გაკვეთილებზე არ შედიან", – ამბობს აქციის ერთ–ერთი მონაწილე, სოფელ დერცელში მცხოვრები ზურა მიქელაძე.

შეგახსენებთ, რომ გუშინ, 22 ოქტომბერს, სოფელ მოხეში მუსლიმებმა ძველი მეჩეთის შენობაში ბიბლიოთეკის გახსნის სამუშაოები გააპროტესტეს, რასაც სამართალდამცავებთან დაპირისპირება მოჰყვა. დაკავებულია 14 მუსლიმი.

[თამარ თოთაძე, ადიგენი]