ირაკლი ღარიბაშვილი მოხის მოვლენებზე: ყოველგვარი ძალადობა მიუღებელია

ირაკლი ღარიბაშვილმა მოხეში მიმდინარე მოვლენებზე მთავრობის სხდომაზე ისაუბრა. მან მოხეში განვითარებულ მოვლენებს სამწუხაროს უწოდა და აღნიშნა, რომ ყოველგვარი ძალადობა მიუღებელია.

პრემიერის განმარტებით, საკითხს ვრცელი ისტორია აქვს.სოფელში მცხოვრები ქრისტიანები ამბობენ, რომ ამ ადგილზე ადრე იყო ეკლესია, რომელიც დაანგრიეს და ნანგრევებით მეჩეთი ააშენეს. შემდეგ ერთი საუკუნის განმავლობაში, ის იყო კულტურის სახლი და დღემდე უსარგებლო შენობა, რომლისთვისაც ყურადღება არ მიუქცევიათ.

„ადგილობრივმა გამგეობამ გამოაცხადა ტენდერი, კონკურსი იმის თაობაზე, რომ ამ ადგილზე მოეწყობოდა ბიბლიოთეკა, რომლითაც ისარგებლებდნენ სოფელში მცხოვრები როგორც ქრისტიანები, ისე მუსლიმები. მოეწყობოდა კარგი კულტურული დაწესებულება, რათა თავიდან აგვერიდებინა კონფლიქტი, ვინაიდან ერთის მხრივ ქრისტიანები აცხადებდნენ, რომ აქ იყო ისტორიულად ეკლესია, ხოლო მუსულმანები ამბობდნენ, რომ აქ იყო მეჩეთი“, - განაცხადა პრემიერ-მინისტრმა.

ირაკლი ღარიბაშვილმა განმარტა, რომ ამ საკითხის შესწავლასთან დაკავშირებით სამცხე-ჯავახეთის მუფთისგან თხოვნა მიიღო, თუმცა მსგავსი თემებისთვის შექმნილია რელიგიის საკითხთა სააგენტო, რომელიც საჭიროების შემთხვევაში რეკომენდაციას მთავრობას წარუდგენს. სააგენტოს ამ თემაზე მთავრობისთვის არ მიუმართავს.

„ვესაუბრე გუბერნატორს, რომელსაც ჰქონდა კომუნიკაცია რეგიონის მუფთთან. ჩამოყალიბდნენ იმაზე, რომ მუფთისთვის, სოფელში არსებულ მეჩეთთან ახლოს სახელმწიფო სახსრებით აშენდებოდა პატარა ზომის რეზიდენცია, რადგან მთავარი მოთხოვნა სწორედ ეს იყო. სოფელში უკვე არსებობს მეჩეთი და მუსულმანებს ლოცვის პრობლემა არ აქვთ, შესაბამისად, ვფიქრობ, ეს იყო ნორმალური გადაწყვეტილება იმისთვის, რომ არ მომხდარიყო კონფლიქტი. რა თქმა უნდა დასაგმობი და მიუღებელია ის, რაც მოხდა გუშინ, იგივე პოლიციის მანქანების დაზიანება ქვებით. ყველა მოქალაქე კანონთან თანასწორია“, - აღნიშნა პრემიერმა.

ირაკლი ღარიბაშვილის ინფორმაციით, სამცხე-ჯავახეთის გუბერნატორი ამ საკითხს ადგილობრივ მოსახლეობასთან კიდევ ერთხელ გაარკვევს.
„კიდევ ერთხელ მოვუწოდებ ყველას, იქნება ეს ქრისტიანი თუ მუსულმანი მოსახლეობა - თქვენ ხართ ჩვენი ქვეყნის მოქალაქეები, თქვენ ხართ თანასწორნი და ვალდებული ხართ, დაემორჩილოთ კანონს. სახელმწიფო არავის მისცემს თქვენი უფლებების შელახვის უფლებას“, - განაცხადა პრემიერ-მინისტრმა.

შეგახსენებთ, რომ გუშინ, 22 ოქტომბერს, სოფელ მოხეში მუსლიმებმა ძველი მეჩეთის შენობაში ბიბლიოთეკის გახსნის სამუშაოები გააპროტესტეს, რასაც სამართალდამცავებთან დაპირისპირება მოჰყვა. დაკავებულია 14 მუსლიმი. მუსლიმები დაკავებულების გათავისუფლების მოთხოვნით სამცხე–ჯავახეთის სამხარეო სამმართველოსთან მთელი ღამის განმავლობაში მართავდნენ აქციას. აქცია ამ წუთებშიც გრძელდება.

[ნინო ნარიმანიშვილი, ახალციხე]