ჯამბულ აბულაძე: ვნანობ, რომ მხარი დავუჭირე 'ქართულ ოცნებას'

ამის შესახებ ჯამბულ აბულაძემ „ტაბულას“ ეთერში, გადაცემა „ფოკუსში“ ისაუბრა.

ჭელის მეჩეთის წინამძღვარმა გადაცემაში მოხეში მიმდინარე მოვლენებზე ისაუბრა და განაცხადა, რომ მეჩეთის შენობის გადაცემას მუსლიმები 2007 წლიდან ითხოვენ.

ჯამბულ აბულაძემ აღნიშნა, რომ მუსლიმებს იმედი ჰქონდათ, რომ პრობლემა ხელისუფლების ცვლილების შემდეგ მოგვარდებოდა, თუმცა, მოტყუვდნენ.

ჭელის მეჩეთის იმამის შეფასებით, სახელმწიფო ვერ უზრუნველყოფს თავისი მოქალაქეების უსაფრთხოების დაცვას. დღეს მომხდარზე კი პასუხისმგებლობა ახალციხის გუბერნატორს აკაკი მაჭუტაძეს ეკისრება: "მახსენდება ბიძინა ივანიშვილის სიტყვები და მინდა, მოვინანიო ამ ეთერშიც. მან თქვა - ისეთ დემოკრატიას ავაშენებ, ევროპასაც კი გავაოცებო. ჩვენ დემოკრატია კი არ მივიღეთ, საქართველო საით მიექანება წარმოუდგენელია. მე ხმა მივეცი სწორედ ცვლილებებს და დღეს ვნანობ ამას, იმიტომ რომ მწარედ შევცდი და ხელისუფლებაში მოვიდნენ არაკომპეტენტური ადამიანები, რომლებსაც არ აინტერესებთ მოქალაქეთა აზრი, ამ შემთხვევაში ქართველი მუსლიმების აზრი, რომლებიც განსაკუთრებით დაჩაგრულები ვართ“.

ამავე გადაცემაში ჯამბულ აბულაძემ გაიხსენა ბოლო დღეებში სამცხე–ჯავახეთის გუბერნატორთან, აკაკი მაჭუტაძესთან შეხვედრა, რომელიც „საქმის გარჩევას უფრო ჰგავდა“.

შეგახსენებთ, მოხეში დაპირისპირება შენობის გამო დაიწყო. მუსლიმები ძველი მეჩეთის შენობის სამუფთო სამმართველოსთვის გადაცემას ითხოვენ, ადიგენის გამგეობაში კი აცხადებენ, რომ შენობას კულტურის სახლის სტატუსი აქვს და მის რეაბილიტაციაზე ტენდერი გამოაცხადეს. მოხეში ვითარება რამდენიმე დღის წინ, 18 ოქტომბერს გამწვავდა. მაშინ, როდესაც ტენდერში გამარჯვებული კომპანიის წარმომადგენლებმა შენობის დემონტაჟი დაიწყეს. მაშინ, მუსლიმების პროტესტის გამო მუშებმა მოხე დატოვეს.

თუმცა, დღეს, 22 ოქტომბერს, მოხეში კვლავ გამოჩნდა სამშენებლო კომპანია. მისთვის ადგილობრივებს ხელი რომ არ შეეშალათ, სოფელში მობილიზებული იყო პოლიცია, მეტიც, მათ შენობას ცოცხალი ჯაჭვი შემოავლეს. ამ ფაქტს მუსლიმების გაღიზიანება მოჰყვა, სიტყვიერი დაპირისპირება ფიზიკურში გადაიზარდა, რის გამოც სამარტალდამცველებმა 14 მუსლიმი დააკავეს.

მუსლიმების დაკავებას პროტესტი მოჰყვა. მუსლიმურმა თემმა აქცია ჯერ ადიგენის რაიონულ სამმართველოსთან გამართა, შემდეგ კი ახალციხეში, სამხარეო სამმართველოსთან გადაინაცვლა, სადაც აქცია ამ წუთებშიც მიმდინარეობს.

მოხეში მომხდარს გამოეხმაურა საქართველოს სახალხო დამცველი. ომბუდსმენმა ადიგენის მუნიციპალიტეტის გამგეობას მოუწოდა, საკითხის სენსიტიურობიდან და მნიშვნელობიდან გამომდინარე, მოხეში შენობის დემონტაჟი შეაჩეროს. სახალხო დამცველმა განაცხადა, რომ მონიტორინგს გაუწევს მოხეში მიმდინარე მოვლენებს და ასევე იმას, როგორ წარიმართება დაკავებულების საქმე.

[ნინო ნარიმანიშვილი, ახალციხე]