მუსლიმების აქციამ ახალციხეში, სამხარეო სამმართველოსთან გადაინაცვლა

სამმართველოსთან მიმდინარე აქციას შეუერთდნენ ხულოს მუფთი გურამ აბაშიძე და მუსლიმ ქალთა კავშირის თავმჯდომარე ეთერ აბაშიძე.

ხულოს მუფთი გურამ აბაშიძე ამბობს, რომ დაკავებულების მონახულება სურდა, თუმცა, პოლიციამ უფლება არ მისცა: „კართან პოლიციელები დგანან და ამბობენ, რომ თავის საქმეს ასრულებენ. ჩემი თვალით არ მინახავს, მაგრამ ამბობენ, რომ მოხეში ხალხს ტელეფონები დაუმტვრიეს. ეს აქცია თავისას იტყვის, შეხედოს საზოგადოებამ და დასკვნები თავად გააკეთოს. ჩვენ აქ ვართ, არ დავიშლებით, არსად არ წავალთ. 14 ადამიანია დაკავებული და ჩვენი მოთხოვნა მათი უპირობო გათავისუფლებაა“.

მუსლიმ ქალთა კავშირის თავმჯდომარე ეთერ აბაშიძე ამბობს, რომ თუ ხელისუფლება ხალხს ყოფს, მაშინ უნდა გაავლონ ზღვარი ქრისტიანებსა და მუსლიმებს შორის: „თუ ჩვენი ადგილი აქ არ არის, მაშინ ვითხოვთ, რომ დავბრუნდეთ ჩვენს ავტონომიურ აჭარაში. თუ არსებობს ასეთი ზღვარი, გაავლონ! აჭარაში ვიქნებით აჭარლები. მუსლიმი თემის სულში ჩაფურთხებას ვეღარ ავიტანთ. ცხვარი ცხვარიაო, მაგრამ, თუ გაცხადა, ცხარიაო! მუსლიმი მრევლისგან რაიმე ინციდენტს ოდესმე ჰქონია ადგილი? მორწმუნე ხალხი საშიში არაა, ქვეყნის გადარჩენას მორწმუნე ხალხი შეძლებს, ურწმუნოებს ებრძოლონ. სალოცავს ვითხოვთ, სხვას არაფერს“.



აქციაზე შეკრებილები აცხადებენ, რომ ახალციხისკენ მუსლიმები მთელი საქართველოდან მოემართებიან. მათივე თქმით, თუ ხელისუფლება ქრისტიანებსა და მუსლიმებს შორის საზღვარს ავლებს, ეს საზღვარი აჭარაში იქნება და ყველა მუსლიმი იქ მოიყრის თავს.

„რეჟიმი უკვე იყო და დავამხეთ, ახლა უკვე ესეც რეჟიმია. და თუ ეს რეჟიმია, ისე დავხვდებით, როგორც საჭიროა“, – ამბობენ აქციის მონაწილეები.

„უდანაშაულო ხალხი დაიჭირეს, ცემეს, აგინეს და დამნაშავეები კიდევ ესენი არიან?!“ – ამბობს აქციის მონაწილე თეიმურაზ მიქელაძე.

შეგახსენებთ, ახალციხეში აქციამ ადიგენიდან გადაინაცვლა. მუსლიმები დაკავებულების გათავისუფლებას ითხოვენ.

მოხეში სამართალდამცველებმა 14 მუსლიმი დააკავეს. 11 პირი ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციის კანონიერი მოთხოვნისადმი დაუმორჩილებლობა) მუხლებით დააკავეს, ხოლო 3 პირი დაკავებულია სისხლის სამართლის კოდექსის 353-ე მუხლის მე-2 ნაწილით.

შეგახსენებთ, რომ სოფელ მოხეში დღეს დილიდან ხმაური იყო. მუსლიმმა მოსახლეობამ ძველი მეჩეთის შენობის დემონტაჟი გააპროტესტა, რასაც პოლიციასთან დაპირისპირება მოყვა.

მოხეში დაძაბულობა 18 ოქტომბრიდან დაიწყო, მას შემდეგ, რას ძველი მეჩეთის შენობასთან ერთ–ერთი კომპანიის მუშები გამოჩნდნენ და შენობის დემონტაჟი დაიწყეს. დღეს შენობასთან უკვე გაჩნდა აბრა, რომელიც იუწყება, რომ აქ კულტურის სახლი და ბიბლიოთეკა კეთდება. მუსლიმები მშენებლობას ეწინააღმდეგებიან და შენობის მუსლიმთა სამმართველოსთვის გადაცემას ითხოვენ. მეჩეთის შენობასთან უკვე დადგეს აბრაც, რაც აქ ბიბლიოთეკის მშენებლობაზე იუწყება.



[თამუნა უჩიძე, ნინო ნარიმანიშვილი, ახალციხე]