მუსლიმი სასულიერო პირები პრემიერ–მინისტრთან შეხვედრას გეგმავენ

სამცხე–ჯავახეთის მუფთი მამუკა ვაშაყმაძე

მუსლიმი სასულიერო პირები თბილისში დღეს დილით გაემგზავრნენ. ისინი ამბობენ, რომ მოხეში არსებული ვითარება ირაკლი ღარიბაშვილს კიდევ ერთხელ უნდა მოახსენონ.

„ბორჯომში ვიყავით, როცა მოხეში არსებული მდომარეობა შევიტვყვეთ. ჩვენ ვრჩებით თბილისში, რათა შევხვდეთ პრემიერ–მინისტრს. გარდა ამისა, შევხვდებით არასამთავრობო ორგანიზაციებს და საელჩოებს“, – აცხადებს ჭელის მეჩეთის წინამძღვარი ჯამბულ აბულაძე.

სამცხე–ჯავახეთის მუფთი მამუკა ვაშაყმაძე და ჯამბულ აბულაძე პრემიერ მინისტრს 16 ოქტომბერს ბათუმში უკვე შეხვდნენ. მაშინ ირაკლი ღარიბაშვილმა საკითხის შესასწავლად ერთი კვირის ვადა ითხოვა.

შეგახსენებთ, რომ სოფელ მოხეში დღეს დილიდან ხმაურია. მუსლიმმა მოსახლეობამ ძველი მეჩეთის შენობის დემონტაჟი გააპროტესტა, რასაც პოლიციასთან დაპირისპირება მოყვა. ამ დროისთვის დაკავებულია 14 მუსლიმი.

ამ წუთებში, ადიგენის რაიონული სამმართველოს შენობასთან მუსლიმები აქციას მართავენ. ისინი დაკავებულების გათავისუფლებას ითხოვენ.

მოხეში დაძაბულობა 18 ოქტომბრიდან დაიწყო, მას შემდეგ, რას ძველი მეჩეთის შენობასთან ერთ–ერთი კომპანიის მუშები გამოჩნდნენ და შენობის დემონტაჟი დაიწყეს. დღეს შენობასთან უკვე გაჩნდა აბრა, რომელიც იუწყება, რომ აქ კულტურის სახლი და ბიბლიოთეკა კეთდება. მუსლიმები მშენებლობას ეწინააღმდეგებიან და შენობის მუსლიმთა სამმართველოსთვის გადაცემას ითხოვენ.ადიგენის გამგეობაში კი ირწმუნებიან, რომ შენობას კულტურის ძეგლის სტატუსი აქვს და მას ვერ შეუცვლიან.


ჭელის მეჩეთის წინამძღვარი ჯამბულ აბულაძე

[თინათინ ზაზაძე, თამუნა უჩიძე, ადიგენი]