მოხეში ძველი მეჩეთის შენობის დემონტაჟი გაგრძელდა

ამ დროისთვის მოხეში, მეჩეთის შენობასთან სიმშვიდეა.

„სამუშაოები დილიდან დავიწყეთ, არანაირ დაძაბულობას ადგილი არ ჰქონია“, – ამბობს ზურაბ ტაბიძე.

ჭელის მეჩეთის წინამძღვარი ჯამბულ აბულაძე თბილისშია. იგი ამბობს, რომ სოფელში რა ხდება არ იცის.
„ჩვენ დოკუმენტაცია პრემიერს გადავუგზავნეთ და მისგან ველოდებით პასუხს“, – ამბობს ჯამბულ აბულაძე და ამატებს, რომ მისი ინფორმაციით ამწუთებში მოხეში ძველი მეჩეთის შენობასთან პოლიციაა მობილიზებული.

შეგახსენებთ, რომ 18 ოქტომბერს მოხეში ქრისტიანები და მუსლიმები ერთამენთს დაუპირისპირდნენ. სოფელში დაძაბულობა მას შემდეგ დაიწყო, რაც მეჩეთის შენობასთან ტენდერში გამარჯვებული კომპანიის მუშახელი გამოჩნდა. მუშების გამოჩენისთანავე შენობასთან მუსლიმი მრევლი შეიკრიბა და შენობის დემონტაჟის შეწყვეტა მოითხოვა. მშენებლებმა სოფელი მალევე დატოვეს.

მუსლიმები შენობის მუსლიმთა სამმართველოსთვის გადაცემას ითხოვენ, ადიგენის გამგეობაში კი აცხადებენ, რომ შენობას კულტურის სახლის სტატუსი აქვს და ამ ადგილას კულტურის სახლი უნდა გაკეთდეს.

[მანანა სარაშვილი, ადიგენი]