ადიგენის რაიონულ სამმართველოსთან მუსლიმები აქციას მართავენ

ადგილობრივები ამბობენ, რომ პოლიციამ მუსლიმები უმიზეზოდ დააკავა.

„არ ვიცი ჩემი შვილი რატომ დააკავეს, არაფერს აშავებდა. ცალი ბოტასით ჩატენეს“, – ამბობს სოფელ აფიეთის მკვიდრი მიხეილ ირემაძე.
მისი თქმით, დაშავებული არიან ქალებიც და კაცებიც.

დაკავებულების გათავისუფლებას ითხოვს სოფელ დერცელში მცხოვრები რევაზ ბერიძე. მისი თქმით, პოლიციამ მუსლიმებს, რომლების მოხეში მიმდინარე მოვლენებს მობილური ტელეფონებით იღებდნენ, ტელეფონები ჩამოართვა.

„ვინც შეეპასუხა წაიყვანეს. ერთ–ერთი დაკავებული ჩემი შვილია. როგორც ვიცით, ადიგენის პოლიციაში ჰყავთ, მოვითხოვთ გაათავისუფლონ დაკავებულები. მთელი გუბერნია და გამგეობა იქ იყო და ხედავდნენ რაც ხდებოდა. პოლიციელები მაშინ გაღიზიანდენენ, როცა ჩემმა შვილმა ტელეფონით გადაღება დაიწყო. ყველას დაუმტვრიეს ტელეფონი, ვინც იღებდა“.

შეგახსენებთ, რომ სოფელ მოხეში დღეს დილიდან ხმაურია. მუსლიმმა მოსახლეობამ ძველი მეჩეთის შენობის დემონტაჟი გააპროტესტა, რასაც პოლიციასთან დაპირისპირება მოყვა. ამ დროისთვის დაკავებულია 14 მუსლიმი.

მოხეში დაძაბულობა 18 ოქტომბრიდან დაიწყო, მას შემდეგ, რას ძველი მეჩეთის შენობასთან ერთ–ერთი კომპანიის მუშები გამოჩნდნენ და შენობის დემონტაჟი დაიწყეს. დღეს შენობასთან უკვე გაჩნდა აბრა, რომელიც იუწყება, რომ აქ კულტურის სახლი და ბიბლიოთეკა კეთდება. მუსლიმები მშენებლობას ეწინააღმდეგებიან და შენობის მუსლიმთა სამმართველოსთვის გადაცემას ითხოვენ.

[თინათინ ზაზაძე, თამუნა უჩიძე, ადიგენი]