დასავლეთ საქართველოს მუფთი ჯემალ პაქსაძე გადადგა

ჯემელ პაქსაძე მუსლიმთა სამმართველოს 4 წელი და 5 თვე ხელმძღვანელობდა. მისი განმარტებით, გადადგომის მიზეზი ჯანმრთელობასთან დაკავშირებული პრობლემები გახდა.

"საკუთარი სურვილით მივიღე ეს გადაწყვეტილება და გადავდექი. ბოლო ერთი წლის განმავლობაში ჯანმრთელობის მდგომარეობა გამიუარესდა და გადადგომის მიზეზი ეს არის. 22 ნოემბერს შევკრიბე მეჯლისთა საბჭო და გავაკეთე განცხადება გადადგომასთან დაკავშირებით", – განაცხადა ჯემელ პაქსაძემ "სამხრეთის კარიბჭესთან სატელეფონო საუბარში.

მისი თქმით, იმავე დღეს, 22 ნოემბერს, რელიგიის საბჭოზე ხმათა უმრავლესობით აირჩიეს ახალი მუფთი ბეგლარ ქამაშიძე, რომელიც მანამდე ხელვაჩაურის მუფთი იყო.

"საბჭოს 16 წარმომადგენელი ესწრებოდა და ქამაშიძე ხმათა უმრავლესობით გახდა სრულიად საქართველოს მუფთი. ვუსურვებ წარმატებას და ჩვენი ქვეყნის, ერის და სამშობლის სამსახურში ყოფილიყოს", – ამბობს ჯემალ პაქსაძე.

სრულიად საქართველოს მუფთის გადადგომის შესახებ მოგვიანებით შეიტყო სამცხე–ჯავახეთის მუფთმა მამუკა ვაშაყმაძემ. როგორც იგი ამბობს რელიგიის საბჭოზე სამცხე–ჯავახეთიდან არავინ მიუწვევიათ.

"ჯემალ პაქსაძე დიდი ხნის წინ უნდა გადამდგარიყო. ახალი მუფთი ძალიან კარგი პიროვნებაა. ის არის გონიერი, განათლებული და იმედი მაქვს, რომ კარგი შემართებით წარუძღვება სამუფთო სამმართველოს", – ამბობს სამცხე–ჯავახეთის მუფთი მამუკა ვაშაყმაძე.

მისი თქმით, ჯემალ პაქსაძის გადადგომა მის მიმართ მუსლიმი ხალხის უნდობლობის გამოცხადებამ გამოიწვია, თუმცა არ გამორიცხავს, რომ მიზეზი ჯანმრთელობის პრობლემებიც ყოფილიყო.

"მე ვფიქრობ, რომ უნდობლობა არა მარტო სამცხე–ჯავახეთის მუსლიმმა მრევლმა გამოუცხადა, არამედ მთელმა საზოგადოებამ და ეს არის ჩემთვის სანიშნო ფრომა. რაც შეეხება მოხეში მოვლენების განვითარებას, იგი ხალხს დაპირდა და შეცდომაში შეიყვანა, რამაც დაპირისპირება და ქაოსი გამოიწივა. ახალ მუფთს დროს მივცემთ, ვნახავთ რა პროგრამას შემოგთავაზებს. თუ რეორგანიზაცია არ მოხდა სამუფთო სამმართველოში, თუ ახალი მეჯლისი არ ჩამოყალიბდა და მეჯლისმა არ მართა სიტუაცია, როგორც სინოდი მართავს და ისევ ანალოგიური გარძელდა, რასაც ჯემალ პაქსაძე აკეთებდა თვითნებურად შესაძლებელია მასაც გამოუცხადოთ უნდობლობა", – ამბობს მამუკა ვაშაყმაძე.

[თინათინ ზაზაძე, ახალციხე]