ვინ ასრულებს ახალციხის ციხის დირექტორის მოვალეობას

ახალციხის ციხის დირექტორი გუჯა ბიჭაშვილი შვებულებაში მიმდინარე წლის 7 ივლისს გავიდა. რის შემდეგაც დირექტორის მოვალეობას მისი თანაშემწე კულტურის დარგში ლაშა ამირეჯიბი ასრულებდა. 7 აგვისტოდან კი დირექტორის მოვალეობის შემსრულებლად ახალციხის ციხის მატერიალურ–ტექნიკური რესურსების მართვის სამსახურის უფროსი ილია სიდამონიძე დაინიშნა.

ქალაქ ახალციხის მერის გიორგი კოპაძის თქმით, ბიჭაშვილმა შვებულება გაიხანგრძლივა. ამ დროის განმავლობაში ერთი ადამიანი მოვალეობის შემსრულებლად ორჯერ ვერ დაინიშნებოდა. ამიტომ ლაშა ამირეჯიბი ილია სიდამონიძემ ჩაანაცვლა.

"ლაშა ამირეჯიბს ხელშეკრულებით გათვალისწინებული ვადა დაუმთავრდა და დაინიშნა სხვა. მე არ ვფიქრობ, რომ ეს ადამიანი უნდა ყოფილიყო ამ თანამდებობაზე, ეს იყო დირექტორის გადაწყვეტილება. მე ფვიქრობ, რომ ის ვინც კარგად შეასრულებს დირექტორის მოვალეობას ილია სიდამონიძეა", – ამბობს გიორგი კოპაძე და ამატებს, რომ სიდამონიძის მუშაობის პერიოდში ციხეში ტურისტების რაოდენობა გაიზარდა.

რამდენი ხნის განმავლობაში დარჩება დირექტორის მოვალეობის შემსრულებლად ილია სიდამონიძე ქალაქის მერი ვერ აკონკრეტებს. თუმცა ამბობს, რომ ბიჭაშვილის სამსახურში დაბრუნების შემდეგ ახალი დირექტორი დაინიშნება. ახალი უფროსის დანიშვნის შემდეგ კი ახალციხის ციხის წესდება შეიცვლება.

"ველოდებით, რომ აუდიტი შევიდეს და ამის შემდეგ დაინიშნება ახალი ხელმძღვანელი. სავარაუდო კანდიდატები არსებობენ, თუმცა ჯერ კონკრეტული პიროვნება არ შემირჩევია. მთავარია, რომ ახალი უფროსი იყოს ტურისტების მოზიდვაზე ორიენტირებული, განათლება მეტი ჰქონდეს და მეტად ერკვეოდეს რაღაც–რაღაც საკითხებში, ასევე კარგი მენეჯერი უნდა იყოს. აუცილებლას იქნება ადგილობრივი, რადგან მე არ მივესალმები აქ ვიღაცეების ჩამოყვანას", – ამბობს კოპაძე და ამატებს, რომ გადაიხედება თანამშრომლების ანაზღაურებაც და ციხის უფროსის ხელფასის შემცირების ხარჯზე, შესაძლოა თანამშრომლების ხელფასები გაიზარდოს.

შეგახსენებთ, რომ ერთთვიანი შვებულების გასვლის შემდეგ ახალციხის ციხის დირექტორი გუჯა ბიჭაშვილი სამსახურში არ დაბრუნებულა. როგორც მან "სამხრეთის კარიბჭესთან" სატელეფონო საუბარში განაცხადა, ჯანმრთელობის მდგომარეობის გამო ბიულეტენი აიღო. ბიულეტენით განსაზღვრული დრო 15 სექტემბრამდე გრძელდება. თუმცა ბიჭაშვილის თქმით, შესაძლოა მისი შვებულება კიდევ გახანგრძლივდეს. ეს მის ჯანმრთელობის მდგომარეობაზეა დამოკიდებული.

"ბიულეტენზე ვარ და ხელფასს არ ვიღებ. ვნახოთ, შეიძლება შვებულება კიდევ გავაგრძელო, იურიდიულად ამის უფლება მაქვს", – ამბობს გუჯა ბიჭაშვილი.

[თამარ თოთაძე, ახალციხე]