ლაშა ამირეჯიბი ახალციხის ციხის დირექტორის თანაშემწედ ინიშნება

ჭაბუა ამირეჯიბის შვილი, „სახალხო კრების“ წევრი ლაშა ამირეჯიბი ახალციხის ციხის დირექტორის გუჯა ბიჭაშვილის თანაშემწედ ინიშინება.

„ვინიშნები თანაშემწედ კულტურის დარგში, რაღაც საბუთები მაკლია და ახლა მათ ვაგროვებ. ნაწილობრივ შევუდექი კიდეც ჩემი მოვალეობის შესრულებას“, - განაცხადა „სამხრეთის კარიბჭესთან“ სატელეფონო საუბარში ამირეჯიბმა.

მას დამთავრებული აქვს სამხატვრო აკადემია: „ასევე დავამთავრე ირუდიული ფაკულტეტიც. ვმუშაობდი მოქანდაკეებთან ერთად, ასევე ვმუშაობდი მუზეუმშიც“.

იგი თბილისიდან ახალციხეში დასაქმების მიზეზს ასე ხსნის: „სამცხე-ჯავახეთი საქართველოში ყველაზე მძიმე რეგიონია, რადგან ის წლების განმავლობაში ვანო მერაბიშვილის რეგიონად ითვლებოდა. სამცხე-ჯავახეთიდან უნდა დაიწყოს სამართლიანობის აღდგენა საქართველოში“.

კითხვაზე - როგორ ხედავს საკუთარ როლს ამ პროცესში, გვპასუხობს: „ხალხს აღარ უნდა ჰქონდეს იმისი შიში, რომ ვანო მერაბიშვილი, მესხელი და მათნაირი ადამიანები კიდევ შეაწუხებენ რეგიონს. ადამიანებმა უნდა იცხოვრონ თავისუფლად და ბედნიერად. ჩემი მხრიდან რასაც შევძლებ, იმით დავეხმარები თქვენს რეგიონს. მერაბიშვილის შიში უნდა გავაქროთ სამცხე-ჯავახეთში“.

„სამხრეთის კარიბჭეს“ კითხვას, მოდის თუ არა წინააღმდეგობაში მის სურვილთან ის, რომ ახალციხის ციხის აშენება სწორედ მერაბიშვილის სახელს უკავშირდება, ასე პასუხობს: „ციხე ხალხის ფულით, ბიუჯეტში შესული თანხებითაა აშენებული. ის მერაბიშვილს საკთარი ფულით არ აუშენებია. უფრო მეტიც, ეს ციხე პატიოსანი, ნამუსიანი ხალხისთვის წართმეული ფულით ააშენეს“.

სამომავლოდ ამირეჯიბი ციხეზე ცნობილი მოქანდაკეების გამოფენების, ახალგაზრდა პოეტების, მწერლების საღამოების, ასევე წიგნების პრეზენტაციების და სხვა ღონისძიებების მოწყობას გეგმავს და ამბობს, რომ ამ მიმართულებით კულტურის სამინისტროსთან ერთად აქტიურად იმუშავებს. თუმცა, ამ ყველაფრის განსახორციელებლად ახალციხეში იმუშავებს თუ თბილისში დარჩება და ღონისძიებების მოწყობას იქიდან დაგეგმავს, ჯერ გარკვეული არ არის.

„რომ ჩამოვალ, ხელმძღვანელობასთან ერთად გადავწყვეტ მანდ ვიცხოვრებ თუ თბილისში ვიქნები. თუ საჭიროდ ჩათვლიან, ყოველდღე მანდ ვიქნები“, - ამბობს ამირეჯიბი.

ახალციხის ციხეში ხელშეკრულებითაა თუ არა აყვანილი და დაიწერა თუ არა უკვე მისი დანიშვნის შესახებ ბრძანება „სამხრეთის კარიბჭემ“ ამ დრომდე ვერ გაარკვია. ახალციხის ციხის დირექტორი ელგუჯა ბიჭაშვილი „სამხრეთის კარიბჭესთან“ კომენტარის გასაკეთებლად ვერ იცლის. დღეს, 16 იანვარს „სამხრეთის კარიბჭე“ ციხის კანცელარიაშიც არ შეუშვეს. როგორც დაცვის თანამშრომელმა განაცხადა, კანცელარიის თანამშრომელი დღეს სამსახურიდან გათავისუფლებულია, ბიჭაშვილს კი სტუმრები ჰყავს და ქალაქშია გასული. თუმცა, ციხეში მისვლამდე რამდენიმე წუთით ადრე ციხის დირექტორმა „სამხრეთის კარიბჭესთან“ სატელეფონო საუბარში განაცხადა, რომ თათბირი ჰქონდა და კომენტარის გასაკეთებლად ამიტომ არ ეცალა. ამ წუთამდე კი იგი სატელეფონო ზარებს აღარ პასუხობს.

შეგახსენებთ, რომ ლაშა ამირეჯიბი ახლაციხეში აქტიურად მას შემდეგ გამოჩნდა, რაც ხელისუფლების შეცვლის შემდეგ მუნიციპალიტეტში გამგებლების შერჩევა დაიწყო. მაშინ იგი ბესო ხითარიშვილის გამგებლად დანიშვნას აპროტესტებდა და მას „მერაბიშვილის ხელის კაცს“ უწოდებდა. ამირეჯიბი ახალციხის მუნიციპალიტეტის გამგებლის მოვალეობის ამჟამინდელ შემსრულებელს ბესიკ ბლიაძეს დადებითად ახასიათებს და ამბობს, რომ „ბლიაძე კარგი ქართველი, წესიერი კაცია“.

[თამუნა უჩიძე, ახალციხე]