ახალციხის ციხის დირექტორად გუჯა ბიჭაშვილი დაინიშნა

ააიპ ახალციხის ციხის დირექტორის თანამდებობა ვაკანტური მიმდინარე წლის 11 მარტიდან იყო. ყოფილმა ხელმძღვანელმა ბესიკ ბლიაძემ თანამდებობა საკუთარი განცხადების საფუძველზე დატოვა. იგი ახალციხის მუნიციპალიტეტის გამგებლის მოვალეობის შემსრულებად დაინიშნა. ამ დროის განმავლობაში ხელმძღვანელის მოვალეობას დროებით მოადგილე გიორგი ჩერქეზიშვილი ასრულებდა.

ციხის უფროსის ხელმძღვანელად დანიშვნამდე გუჯა ბიჭაშვილი არასამთავრობო ორგანიზაცია ”ერთსულოვნება საზოგადოების უფლებებისათვის” ახალციხის რაიონული ორგანიზაციის ხელმძღვანელი იყო. გუჯა ბიჭაშვილი ამბობს, რომ მისი დანიშვნა განცხადების საფუძველზე, საკრებულოს თავმჯდომარისა და გამგებლის მოვალეობის შემსრულებლის შეთანხმებით მოხდა.

”ვაკანტური იყო ადგილი, ახალციხის მუნიციპალიტეტის საკრებულოში განცხადება შევიტანე და ამის შემდგომ მოხდა ჩემი დანიშვნა”, - განმარტავს გუჯა ბიჭაშვილი. იგი სამომავლო გეგმებზეც საუბრობს და ამბობს, რომ ტურიზმის განვითარება ყველაზე მნიშვნელოვანია.

[თამარ თოთაძე, ახალციხე]