ახალციხის მერი: 'ახალციხის ციხის' დირექტორი აუცილებლად შეიცვლება'

ახალციხის მერი გიორგი კოპაძე

მოსალოდნელი საკადრო ცვლილებების შესახებ ახალციხის მერმა გიორგი კოპაძემ დღეს, 14 ივლისს, ქალაქის საკრებულოს პირველი სხდომის დასრულების შემდეგ, მედიის წარმომადგენლებთან განაცხადა.

„აუცილებლად შეიცვლება ახალციხის ციხის დირექტორი“, - აცხადებს კოპაძე.

ვინ ჩაანაცვლებს „ახალციხის ციხის“ დირექოტრს გუჯა ბიჭაშვილს, მერიაში ჯერ არ იციან.

„მაგრამ, ის, ვინც ამ პოსტზე დაინიშნება, აუცილებლად განათლებული პიროვნება იქნება. ასევე, იქნება თავისი ქალაქის პატრიოტი, მუშაობას წარმართავს ახალციხის საკეთილდღეოდ და არ იქნება წურბელასავით მობმული ქალაქის ბიუჯეტზე“, - გვითხრა კოპაძემ.
მისი განცხადებით, ციხეზე შტატები გაბერილი, ხელფასები კი ძალიან დაბალია: „ის ადამიანები, რომლებიც ნამდვილად შრომობენ და ფული შემოაქვთ, გვერდზე ჰყავთ გაწეული, ჩვენ შემთხვევაში კი ეს ასე აღარ იქნება“.


ახალციხის ციხის დირექტორი გუჯა ბიჭაშვილი

„ახალციხის ციხის“ დირექტორი გუჯა ბიჭაშვილი შვებულებაში მიმდინარე წლის 7 ივლისს გავიდა. მაშინ მან „სამხრეთის კარიბჭეს“ კითხვაზე, მისი შვებულება ადგილობრივი ხელისულფების შეცვლას ხომ არ უკავშირდებოდა, რაც საბოლოოდ „სახლში წასვლას“ გულისხმობდა, გვიპასუხა: „ არსად წასვლას არ ვაპირებ. ეს შვებულება არ უკავშირდება იმას, რომ აქედან მივდივარ. 10 აგვისტოს გამოვალ შვებულებიდან და 11-ში დილით უკვე სამსახურში ვიქნები“.

ასევე კითხვაზე, ჰქონდა თუ არა მოლოდინი, რომ ხელისუფლების შეცვლისთანავე მასაც შეცვლიდნენ, განაცხადა: „არანაირად! დარწმუნებული ვარ, რომ ასე იქნება. ჩემი და ოლეგის (ახალციხის მუნიციპალიტეტის საკრებულოს ყოფილი თავმჯდომარე) ძმობას ერთმანეთში ნუ აურევთ“.

ამჟამად ბიჭაშვილის მოვალეობას ციხეზე მისი თანაშემწე კულტურის დარგში, ლაშა ამირეჯიბი ასრულებს. ვინ ჩაანაცვლებს ბიჭაშვილსა და ამირეჯიბს, ცნობილი მაქსიმუმ ორ კვირაში გახდება.

[თამუნა უჩიძე, ახალციხე]