კანდიდატის წარდგენის ცერემონიას ადიგენში მოსახლეობა მუნიციპალიტეტის თითქმის ყველა სოფლიდან ესწრებოდა, ისინი დაბაში სამარშრუტო ტაქსებით ჩამოიყვანეს.
საქართველოს პარლამენტის თავმჯდომარემ დავით ბაქრაძემ ადიგენის მუნიციპალიტეტში მაჟირიტარ კანდიდატად ადიგენის მკვიდრი ზურაბ ჩილინგარაშვილი წარადგინა. ჩილინგარაშვილი 2006-2008 წლებში ადიგენის მუნიციპალიტეტის გამგებელი იყო. ბოლოს კი საქართველოს ეკონომიკური საზღვრის დაცვის დეპარტამენტის დირექტორის პირველი მოადგილის თანამდებობა ეკავა.
ბაქრაძე ადიგენში, სტადიონზე შეკრებილ ასობით ადამიანს ქვეყანაში მიმდინარე რეფორმებზე ესაუბრა.
- ”ადიგენი გახლავთ ის კუთხე, რომელიც წლების განმავლობაში მოწყვეტილი იყო ყველაფერს, აქ წლების განმავლობაში არ ხდებდა არანაირი პროგრესი. ეს იყო რაიონი, სადაც მოსახლეობას ყველაზე მეტად უჭირდა. ბოლო წლების განმავლობაში ქვეყანაში ბევრი რამ გაკეთდა და დღეს ჩვენი ამოცანაა, რომ ამ რაიონში შემოვიტანოთ მეტი სიკეთე, გვინდა რომ ყველა ოჯახში იყოს მეტი სარგებელი და კეთილდღეობა”, - განაცხადა ბაქრაძემ.
ზურაბ ჩილინგარაშვილმა შეკრებილ საზოგადოებას მხარდაჭერისთვის მადლობა გადაუხადა. ასევე მადლობა გადაუხადა ბაქრაძეს ჩამობრძანებისთვის და ”ნაციონალურ მოძრაობას” ნდობის გამოცხადებისთვის: ”ნაციონალური მოძრაობის სამი პრიორიტეტი: დაზღვევა, სოფლის მეურნეობა და უმუშევრობის დამარცხება ჩვენი რაიონისთვის ძალიან მნიშვნელოვანია, სამივე ძალიან აწუხებს ადიგენს და ვეცდებით პრობლმები ამ მიმართულებით მოვაგვაროთ”.
ჩილინგარაშვილის თქმით, ადიგენისთვის მნიშვნელოვანი პრობლემაა ისიც, რომ რაიონში არ არსებობს არცერთი საწარმო: ”შევეცდებით მომავალში მთავრობასთან ერთად აქ გავაშენოთ წვენის ქარხანა. უფრო სწორად, აღვადგენთ ყველა ის საწარმო, რომელიც შევარდნაძის მთავრობის პერიოდში დაანგრიეს”.
წარდგენის ცერემონიას მოსახლეობა მუნიციპალიტეტის თითქმის 55-ვე სოფლიდან ესწრებოდა. სამარშრუტო ტაქსები სტადიონთან თავს სხვადასხვა სოფლებიდან დილიდანვე იყრიდნენ.
ადგილობრივების განცხადებით, მათ ”მარშუტკები” ადიგენიდან გამგებელმა გაუგზავნა და შესაბამისად მგზავრობის ღირებულება არ გადაუხდიათ.
- ”მარშუტკით მოგვიყვანეს, იმედი გვაქვს რომ ზურა გაიმარჯვებს. ჩემთვის თუ არა, რაიონისთვის მას ბევრი რამ გაუკეთებია. კონკრეტულად მის გაკეთებულ რაიმეს ამ წუთში ვერ ვიხსენებ, მაგრამ კარგი კაცია!” - აცხადებს აბასთუმნელი ცირა ჩილინგარაშვილი.
სტადიონზე იყვნენ შეკრებილი აბასთუმნის ტუბსაავადმყოფოს თანამშრომლებიც. დეტალურად ჩილინგარაშვილის გამგებლობის პერიოდში გაკეთებული საქმეები ვერც მათ გაიხსენეს, თუმცა ამბობენ, რომ როცა კი რაიმე დასჭირვებიათ, ყოველთვის გვერდში დადგომიათ.
- ”თავისი ადამიანობითა და ხალხათან ურთიერთობით დიდი სიყვარული დაიმსახურა. ასი პროცენტით ვარ დარწმუნებული მის გამარჯვებაში”, - ამბობს ტუბსააავადმყოფოს მთავარი ბუღალტერი ნელი ლაგვილავა.
ასევე დარწმუნებულია ჩილინაგარშვილის გამარჯვებაში შოყელი მანანა პეტრიაშვილიც: ”მთელი სოფელი აქ ვართ თითქმის. მარშუტკები ადიგენიდან გამოგვიგზავნეს, მგზავრობის ღირებულება ჩვენ არ გადაგვიხდია!”
იგივეს აცხადებს თინა კუბლაშვილიც: ”სოფლიდან ყველა აქ ვართ. გამგეობამ გამოგზავნა ”მარშუტკა” ჩვენთან”.
ადიგენის მუნიციპალიტეტის გამგებლის სიმონ პარუნაშვილის თქმით, გამგეობას სამარშრუტო ტაქსები სოფლებიდან მოსახლეობის წამოსაყვანად არ გაუგზავნია: ”მოსახლეობამ საწვავი თავად ჩაასხა და ჩამოვიდა”.
სამარშრუტო ტაქსის მძღოლი სიმონ მარკოიძე, რომელმაც მოსახლეობა დაბაში ჭეჭლიდან ჩამოიყვანა, ამბობს, რომ მანქანა მისია, საწვავიც თავად ჩაასხა და მოსახლეობა სოფლიდან ადიგენში საკუთარი ინიციატივით ჩამოიყვანა: ”დავინტერესდი როგორ შენდება ქვეყანა, რა ხდება ახალი”.
სხვა ათობით სამარშრუტო ტაქსის მძღოლმა პრესასთან კომენტარის გაკეთებისგან თავი შეიკავა.
დღესვე ”ნაციონალურმა მოძრაობამ” მაჟორიტარი დეპუტატობის კანდიდატი წარადგინა ასპინძაშიც. ასპინძის მუნიციპალიტეტის სოფელ საროს მკვირდი ტარიელ ლონდარიძე თავდაცვის სამინისტროში მუშაობდა.
ბაქრაძემ ასპინძის შემდეგ მაჟორიტარი კანდიდატი ახალქალაქელებსაც გააცნო. აქ კენჭს სამველ პეტროსიანი იყრის.
[თამუნა უჩიძე, ადიგენი]