„ქართულმა ოცნებამ“ ადიგენში მერობის კანდიდატი წარადგინა [photo\video]

ადიგენის მერობის კანდიდატი ამომრჩევლებს ახალციხისა და ადიგენის გაერთიანებული ოლქის მაჟორიტარმა დეპუტატმა გიორგი კოპაძემ გააცნო. შეხვედრას ადიგენში პარლამენტის წევრი კობა კობალაძეც ესწრებოდა.

„მე დიდი იმედი მაქვს, რომ თითოეული თქვენთაგანი გასაკუთრებით დადგება ჩვენი ზაქარიას და „ქართული ოცნების“ გვერდით. ჩვენ ერთად ვართ, ერთად გავიმაჯვებთ და გავაგრძელებთ მშენებლობას. უფრო მეტი დახმარებები იქნება, უამრავი პროგრამები, რომელიც სახელმწიფოს მიერ ფინანსდება, თქვენთვის არის. მე მოგიწოდებთ მხარი დაუჭიროთ „ქართულ ოცნებას“ და კიდევ ერთხელ ვიზეიმოთ გამარჯვება“ , – ამ სიტყვებით მიმართა მოსახლეობას გიორგი კოპაძემ.

„მინდა მადლობა გითხრათ წინა წლებში დიდი მხარდამჭერისთვის. ის დიდი ნაყოფი, რომელიც ჩვენმა მუნიციპალიტეტმა „ქართული ოცნების“ მოსვლის დღიდან მოიწია, არის თქვენი მხარდაჭერის და სწორად გათვლილი და გაგადმული ნაბიჯის შედეგი“, – განაცხადა შეხვედრაზე მერობის კანდიდატმა ზაქარია ენდელაძემ.

მან ასევე იმ პროექტებზე, ისაუბრა, რომელიც ხელისუფლებაში „ქართული ოცნების“ მოსვლის შემდეგ განხორციელდა.

მერობის კანდიდატის დასახელებას ადიგენში, მუნიციპალიტეტის თითქმის ყველა სოფლიდან ესწრებოდნენ. ადგილობრვების განმარტებით მათი ნაწილი „მარუტკებით“ ნაწილი კი საკუთარი მანქანებით ჩამოვიდნენ.

„მხარს ვუჭერთ ზაქარია ენდელაძეს. ყველაფერს აკეთებს იმისთვის, რომ მოსახლეობამ თავი კარგად იგრძნოს და გაძლიერდეს. „მარშუტკით“ ჩამოვედით, ჩვენ გვქონდა საშუალება, შევიკრიბეთ და წამოვედით“, – ამბობს სოფელ წახანში მცხოვრები რომან ჭაფოძე.

მისივე თქმით, მოსახლეობას „მარშუტკები„ უფასოდ ემსახურებოდათ და ნებისმიერს შეეძლო კანდიდატის წარდგენაზე ადიგენში ჩამოსულიყო.

ადიგენის მოქმედი გამგებლის ზაქარია ენდელაძის, მმართველი გუნდის მხრიდან მერობის კანდიდატად დასახელებას მიესალმება იმერთუბანში მცხოვრები ციალა გელხვიძეც.

„ქვის ხანიდან, ახალ ერაში დაგვაბრუნა. ინფრასტრუქტურა ნახეთ, ბაღები, გზები, ბევრი კარგის თქმა შემიძლია“ , – ამბობს ციალა გელხვიძე.

შეგახსენებთ, რომ გუშინ, 28 სექტემბერს საქართველოს პრემიერ–მინისტრმა გიორგი კვირიკაშვილმა ადგილობრივებს ექვსი მუნიციპალიტეტის მერობის კანდიდატი წარუდგინა.

2017 წლის თვითმმართველობის არჩევნებზე „ქართული ოცნების“ მერობის კანდიდატები არიან: ახალციხეში ზაზა მელიქიძე, ადიგენში ზაქარია ენდელაძე, ასპინძაში როსტომ მაგრაქველიძე, ბორჯომში ლევან ლიპარტია, ახალქალაქში იურიკ უნანიანი და ნინოწმინდაში ანივარდ მოსონიანი.















[თინათინ ზაზაძე, ადიგენი]