დავით ბაქრაძესთან შესახვედრად მოსახლეობა სოფლებიდანაც ჩამოვიდა

დავით ბაქრაძე მხარდამჭერებს მესხეთის სახელმწიფო დრამატულ თეატრში შეხვდა. საარჩევნო პროგრამასა და სამომავლო გეგმებზე პრეზიდენტობის კანდიდატი ერთი საათის განმავლობაში საუბრობდა. დავით ბაქრაძემ ადგილობრივებს მოუწოდა, რომ აუცილებლად მიიღონ არჩევნებში მონაწილეობა და 27 ოქტომბერს სწორი არჩევანი გააკეთონ.

„ერთიანი ნაციონალური მოძრაობის“ საპრეზიდენტო კანდიდატის მხრდამჭერები „სამხრეთის კარიბჭესთან“ საუბარში ამბობენ, რომ საპრეზიდენტო არჩევნებში დავით ბაქრაძის გამარჯვების იმედი აქვთ. მათი თქმით, ბაქრაძე პრეზიდენტობის შემთხვევაში ყველა იმ პრობლემას მოაგვარებს, რაც არამარტო ახალციხის მუნიციპალიტეტში, არამედ მთელი ქვეყნის მასშტაბით არსებობს.

„ძალიან კარგი ადამიანია და იმედი გვაქვს, რომ რასაც დაგვპირდება აუცილებლად შეასრულებს“, - ამბობს ქალაქ ვალეში მცხოვრები ნათია ნაფეტვარიძე.

შეხვედრაზე მისული მხარდამჭერები ამბობენ, რომ დავით ბაქრაძის საარჩევნო პროგრამას იცნობენ და იმედი აქვთ, რომ მისი გამარჯვების შემთხვევაში დაპირებები შესრულდება.

„მართალი კაცია და იმედი გვაქვს, რომ ყველა პრობლემას მოაგვარებს. პირველ რიგში მე მინდა, რომ ქვეყანაში მშვიდობა იყოს და დაკარგული ტერიტორიები დაგვიბრუნდეს“, - ამბობს სოფელ საყუნეთის მკვიდრი ქსენია გურქჩიანი.

დღევანდელ შეხვედრაზე „ერთიანი ნაციონალური მოძრაობის“ შტაბის წევრები, ახალციხის, ასპინძისა და ადიგენის მაჟორიტარი დეპუტატებიც იმყოფებოდნენ. ასევე, სამცხე-ჯავახეთის გუბერნატორი და ადგილობრივი ხელისუფლების ყოფილი წარმომადგენლები. შეხვედრაზე იყვნენ ყოფილი პრემიერ-მინისტრის ვანო მერაბიშვილის მშობლებიც.

„წინასაარჩევნო კამპანია გრძელდება, დღეს ბატონმა დავითმა ახალციხელებს საარჩევნო პროგრამა გააცნო. ხალხის რაოდენობითაც კმაყოფილი ვართ და იმედი გვაქვს, რომ არჩევნებში დავით ბაქრაძე გაიმარჯვებს. მას სერიოზული რეიტინგი აქვს, არამარტო სამცხე-ჯავახეთში და ახალციხეში, არამედ მთელ საქართველოში“, - განაცხადა ახალციხის მაჟორიტარმა დეპუტატმა ვაჟა ჩიტაშვილმა.

„დაახლოებით 700-800 ადამიანია დღევანდელ შეხვედრაზე მოსული. აქ მხოლოდ ის ადამიანები არიან, ვისაც მოსაწვევები გადასცეს, უფრო ფართომასშტაბიანი შეხვედრა რომ ყოფილიყო მეტი მხარდამჭერი მოვიდოდა, - ამბობს ადიგენის მაჟორიტარი დეპუტატი ზურაბ ჩილინარაშვილი და ამატებს, რომ საპრეზიდენტო არჩევნებში დავით ბაქრაძის გამარჯვების იმედი აქვს: როცა ადამიანი იწყებს პოლიტიკურ ბრძოლას, ამას იმიტომ აკეთებს, რომ მივიდეს საბოლოო გამარჯვებამდე“.

შეგახსენებთ, რომ ახალციხელ ამომრჩეველთან შეხვედრის დასრულების შემდეგ „ერთიანი ნაციონალური მოძრაობის“ პრეზიდენტობის კანდიდატი დავით ბაქრაძე ვანო მერაბიშვილის მშობლიურ სოფელში უდეში გაემგზავრა. ადიგენის მაჟორიტარი დეპუტატის ზურაბ ჩილინგარაშვილის თქმით, ამით დავით ბაქრაძე მხარდაჭერას უცხადებს ვანო მერაბიშვილს, როგორც პოლიტიკურ პატიმარს.



[თამარ თოთაძე, ახალციხე]