'ნაციონალურმა მოძრაობამ' სამცხე-ჯავახეთში კანდიდატები წარადგინა

ახალციხეში, ასპინძასა და ადიგენში, კანდიდატებად პარტიამ ყოფილი გამგებლები წარადგინა. თუმცა, ვინაიდან ახალციხე თვითმმართველი ქალაქი ხდება, ახალციხის მუნიციპალიტეტის ყოფილი გამგებელი გელა დემეტრაძე, ქალაქის მერობის კანდიდატი იქნება.

ადიგენისა და ასპინძის ყოფილი გამგებლები სიმონ პარუნაშვილი და ბესიკ ბექაური ადგილობრივი თვითმმართველობის არჩევნებზე ისევ გამგებლობისთვის იბრძოლებენ. რაც შეეხება ახალციხის მუნიციპალიტეტს, აქ გამგებლობის კანდიდატად პარტიამ გოჩა გვარამაძე დაასახელა.

ამ ეტაპზე, „ერთიან ნაციონალურ მოძრაობას“, რეგიონის დანარჩენ სამ მუნიციპალიტეტში: ბორჯომში, ახალქალაქსა და ნინოწმინდაში გამგებლობის კანდიდატები შერჩეული არ ჰყავს.

განსხვავებით კანდიდატებისგან, თითქმის ყველა მუნიციპალიტეტში შერჩეულია სიის პირველი ნომრები. გამონაკლისი ნინოწმინდაა, სადაც არც გამგებლობის კანდიდატის ვინაობაა ცნობილი და არც სიის პირველი ნომრის.

ქალაქ ახალციხეში სიის პირველი ნომერი ზურაბ სადათიერაშვილი იქნება, ახალციხის მუნიციპალიტეტში კი კახაბერ მოდებაძე. ასპინძის მუნიციპალიტეტში სიის პირველი ნომერი გიორგი გიორგაძე იქნება. ადიგენში, ადიგენის მუნიციპალიტეტის საკრებულოს თავმჯდომარე გივი ენდელაძე.

ბორჯომში სიის პირველი ნომერი ვეფხია გრიგალაშვილია, ახალქალაქში კი ჰარუთიუნ ალექსანიანი.

„მეგობრებო მხნედ იყავით!“ - ასე დაასრულა კანდიდატების წარდგენა გიგი უგულავამ.

პარტიაში განმარტავენ, რომ იმ მუნიციპალიტეტებში, სადაც კანდიდატები და სიის პირველი ნომრები არ დაუსახელებიათ, ამ ეტაპზე მსჯელობა მიმდინარეობს და მათი ვინაობაც მალე გახდება ცნობილი.

კანდიდატების წარდგენის ცერემონია მესხეთის თეატრის დარბაზში შედგა. დარბაზი, რომელიც 500 მაყურებელზეა გათვლილი, სავსე იყო.

[თამუნა უჩიძე, თამარ თოთაძე, ახალციხე]