ნანა გელაშვილმა თანამდებობა დატოვა

გელაშვილმა პოსტი დღეს, 31 ივლისს დატოვა. სკოლამდელი აღზრდის დაწესებულებათა გაერთიანების ხელმძღვანელი ირწმუნება, რომ სამსახურიდან საკუთარი განცხადების საფუძველზე წამოვიდა: „ამ ეტაპზე ასე ვამჯობინე".

ვაკანტურ პოსტზე ახალი კადრი შესაძლოა დღის ბოლომდე დაინიშნოს. ვინ უხელმძღვანელებს სკოლამდელი აღზრდის დაწესებულებათა გაერთიანებას, ახალციხის მერიაში არ ამხელენ.

„შეიძლება დღესვე დავნიშნოთ, იმიტომ, რომ ძალიან სასწრაფოა ეს საქმე, სექტემბრიდან ბაღებმა მუშაობა უნდა დაიწყონ. ასევე გასარკვევია თანამშრომლების ხელფასები, რადგან ძალიან ბევრი რამ კანონთან შეუთავსებლობაში მოდის“, – აცხადებს კოპაძე.

კოპაძე ამბობს, რომ შესაძლოა ნანა გელაშვილი სხვა პოზიციაზე დანიშნონ: „ვიფიქრებთ, ნორმალური სპეციალისტია, იცის საქმე და შეიძლება დავასაქმოთ. გადავხედავთ სიტუაციას“.

ნანა გელაშვილი ააიპ ახალციხის სკოლამდელი აღზრდის დაწესებულებათა გაერთიანების ხელმძღვანელად 2013 წლის 4 თებერვლიდან მუშაობდა.

შეგახსენებთ, რომ გიორგი კოპაძემ რამდენიმე დღის წინ „სამხრეთის კარიბჭესთან“ განაცხადა, რომ ქალაქ ახალციხის სკოლამდელი აღზრდის დაწესებულებაში ხელმძღვანელის შეცვლას არ გამორიცხავდა.

[თინათინ ზაზაძე, ახალციხე]