ახალციხის საბავშვო ბაღებისთვის თანამშრომლებს არჩევენ

ახალციხის სკოლამდელი აღზრდის დაწესებულებათა გაერთიანებამ კონკურსი გასული წლის ნოემბერში გამოაცხადა.
მიმდინარე წლის 1 მარტიდან ახალციხის მუნიციპალიტეტის საბავშვო ბაღებში დამატებით ოთხი ჯგუფი გაიხსნება. სწორედ ამ ჯგუფებისთვის ხდება აღსაზრდელების შერჩევა. ტესტირება ორ ეტაპად ჩატარდა.

- ’მოგეხსენებათ, რომ საბავშვო ბაღებში ვაკანტური ადგილები გვაქვს, რაზეც დაწესებულებაში ძალიან ბევრი განცხადება შემოვიდა. გადავწყვიტეთ ტესტირება ჩაგვეტარებინა. უპირატესობა იმ ადამიანებს მივანიჭეთ, ვისაც სკოლამდელი აღზრდისა და ფილოლოგიური განათლება ჰქონდა მიღებული და ამ კუთხით გარკვეული გამოცდილებაც აქვს. შერჩეული 43 კანდიდატიდან ტესტირებაზე ოთხი არ გამოცხადდა’, - განმარტავს ააიპ ახალციხის სკოლამდელი აღზრდის დაწესებულებათა გაერთიანების უფროსი ნანა გელაშვილი და ამატებს, რომ შედეგები მიმდინარე კვირის ბოლოს გახდება ცნობილი.

კონკურსანტებისთვის ტესტები სკოლამდელი აღზრდის დაწესებულებათა გაერთიანებაში შეადგინეს.

- ’ყველა კონკურსანტს პედაგოგიკისა და ფსიქოლოგიის კურსი უნდა ჰქონოდა გავლილი. გარდა ამისა, შეკითხვები ახალი პროგრამიდანაც იყო, რითიც ჩვენ დღეს ვმუშაობთ. უბრალოდ მათი აზრი და შეხედულება გვაინტერესებდა ამ პროგრამასთან დაკავშირებით, ის თუ როგორ გასცემდნენ ისინი ამ შეკითხვებს პასუხს. ამის მიხედვით, მათ ცოდნაზე საერთო აზრი შეგვექნება’, - ამბობს სკოლამდელი აღზრდის დაწესებულებათა გაერთიანების უფროსის მოადგილე მზია ქობესაშვილი და ამატებს, რომ შექმნილია სპეციალური კომისია, რომელიც აღნიშნულ ტესტებს გაასწორებს. თუ რომელიმე მონაწილეს რაიმე პრეტენზია გაუჩნდება, შეუძლია დაწესებულებას მიაკითხოს.

- ’საშუალო დონის ტესტები იყო, ძირითადად ის შეკითხვები იყო, რისი ცოდნაც საბავშვო ბაღის პედაგოგებს მოეთხოვებათ. იმედი მაქვს, რომ ტესტირებას წარმატებით გავივლი, რადგან ამ მიმართულებით გამოცდილება უკვე მაქვს და სპეციალობითაც სკოლამდელი აღზრდის პედაგოგი ვარ’, - ამბობს ზაირა ივანიძე.

ნანა გელაშვილის თქმით, თუ საბოლოო შედეგები დამაკმაყოფილებელი არ აღმოჩნდა, იმ ფილოლოგებს, რომლებიც ამ ტესტირებაზე ვერ მოხვდნენ, ერთი შანსი მიეცემათ, რომ ტესტირება მათაც ჩააბარონ.

[თამარ თოთაძე, ახალციხე]