ახალციხის ბაღების ხელმძღვანელად მერის პრესსამსახურის და დაინიშნა

„ამ საქმეს სჭირდება ძალიან კარგი მენეჯერი, გამოცდილი, მტკიცე ადამიანი, თან სუფთა წარსულით. ეს ადამიანი არის ჩვენი თანამებრძოლი, ვიცნობთ ძალიან კარგად, ამიტომ შევაჩერეთ მასზე ყურადღება. ამ ადგილს ზუსტად ასეთი სჭირდება“, – ამბობს ახალციხის მერი გიორგი კოპაძე.

პროფესიით ქიმიკოსი ნანა ბერიძე მერიის პრესსამსახურის ეკა ბერიძის დაა.

ნანა ბერიძე 1970 წლის 12 აპრილს ქალაქ ახალციხეში დაიბადა.
1990-1995 წლებში სწავლობდა საქართველოს ტექნიკური უნივერსიტეტში ქიმიის ფაკულტეტზე.
1998-2002 წწ. სამცხე-ჯავახეთის რეგიონალურ ნარკოლოგიურ ცენტრში ექიმ-ლაბორანტად მუშაობდა.
1998 -2014 წწ. საზოგადოებრივი აზრის კვლევისა და მარკეტინგის ინსტიტუტში (BCG) ინტრევიუერი იყო.
2004-2014 საქართველოს საზოგადოებრივი აზრისა და ბიზნესის კვლევის ცენტრში „GORBI” ასევე ინტერვიუერი იყო.
2008-დან დღემდე ახალციხის საზოგადეობრივ კოლეჯში ,,მესხეთი’’ ქიმიის მასწავლებელია.
ჰყავს მეუღლე და ორი შვილი.

იგეგმება თუ არა ბაგა–ბაღების მენეჯერების გათავისუფლება, გიორგი კოპაძე გვპასუხობს, რომ ეს იმ შემოწმების პასუხზეა დამოკიდებული, რომელიც სსიპ სურსათის ეროვნულ სააგენტომ სამცხე–ჯავახეთის რეგიონალურ სამმართველოს სპეციალისტ ინსპექტორების მეშვეობით ჩაატარა.

„ჯერ საკითხი ასე არ დგას. ჩვენ ვიწყებთ ინვენტარიზაციას ყველგან. შემოწმდა საბავშვო ბაღები, კვების პროდუქტები შეამოწმეს, ეს დასკვნა მოვა და ამ დასკვნების საფუძველზე ვიფიქრებთ დავტოვოთ თუ არა მენეჯერები. გააჩნია რა სურათი დაგვხვდება საბავშვო ბაღებში. მოარული ხმებით, ცუდი სურათია, მაგრამ ამ ხმებს ვერ დავეთანხმებით, კონკრეტული მაგალითების მიხედვით გადავწყვეტთ. პოლიტიკური ნიშნებით არ შევარჩევთ“, – ამბობს გიორგი კოპაძე.

შეგახსენებთ, ახალციხის სკოლამდელი აღზრდის დაწესებულებათა გაერთიანების ხელმძღვაელმა ნანა გელაშვილმა პოსტი გუშინ, 31 ივლისს დატოვა. გელაშვილი ამბობს, რომ სამსახური საკუთარი ნებით დატოვა.

[თინათინ ზაზაძე, ახალციხე]