ახალციხის ბაგა – ბაღებში სასწავლო პროცესი სექტემბრამდე შეწყდა

ახალციხის სკოლამდელი აღზრდის დაწესებულებათა გაერთიანების დირექტორის ნანა გელაშვილის თქმით, საბავშვო ბაღებში სასწავლო პროცესი მას შემდეგ აღდგება რაც გაირკვევა თუ ვის დაქვემდებარებაში შევა ახალციხის სკოლამდელი აღზრდის დაწესებულებათა გაერთიანება.

„ველოდებით ახალი მთავრობის მოსვლას, რომ გავიგოთ მერიის დაქვემდებარებაში ვართ, გამგეობის თუ საკრებულოსი. უნდა ვიცოდეთ ვინ დაგვაფინანსებს, რომ იმის მიხედვით ხელახლა დავრეგისტრირდეთ შესყიდვების სააგენტოში. სხვაგვარად შესყიდვებს ვერ განვახორციელებთ“, – ამბობს ნანა გელაშვილი.

მისი თქმით აღნიშნული პროცესი ჭიანურდება, ამიტომ ბაგა – ბაღებში სწავლა სექტემბრამდე შეჩერდება.

„ჯერ არ ვიცით როდის მოვა ახალი ხელისუფლება, მერე როდის განიხილება ჩვენი საკითხი. როცა ყველაფერი დალაგდება მერე შესყიდვებზე ტენდერი უნდა გამოვაცხადოთ, ეს ყველაფერი კი დროში ჭიანურდება. მაქსიმალურად შევეცდებით, რომ სწავლა პირველ სექტემბერს აღვადგინოთ“, – ამბობს გელაშვილი.

ახალციხის მუნიციპალიტეტის მასშტაბით, ყველა ბაგა – ბაღში სასწავლო პროცესი 1 ივლისს შეწყდა. ახალციხის სკოლამდელი აღზრდის დაწესებულებათა გაერთიანებაში აცხადებდნენ, რომ სწავლა ერთ კვირაში აღდგებოდა.

[მანანა სარაშვილი, ახალციხე]