მზია ქობესაშვილი: "სამართალმა იზეიმა"

მზია ქობესაშვილი ახალციხის მუნიციპალიტეტის სკოლამდელი აღზრდის დაწესებულებათა გაერთიანების ხელმძღვანელად 6 წლის განმავლობაში მუშაობდა. მას შემდეგ, რაც ადგილობრივი ხელისუფლება შეიცვალა ქობესაშვილი გაათავისუფლეს და მის ადგილზე 2013 წლის 4 თებერვლიდან ნანა გელაშვილი დაინიშნა.

ხელმძღვანელის პოსტიდან გათავისუფლებული ქობესაშვილი სამი თვის განმავლობაში მოადგილის პოსტზე მუშაობდა, თუმცა სამ თვეში აღნიშნული შტატი გაუქმდა.

"საჭირო იყო ჩემი თავიდან მოშორება, იმიტომ გააუქმეს შტატი და სამსახურიდან გამიშვეს. ახლა უკვე სამართალმა იზეიმა. ახლა პროფესიონალიზმს ძალიან დიდი მნიშვნელობა ენიჭება და ეს ფაქტია, ერთად ვმუშაობთ გამოცდილი კადრები",– ამბობს მზია ქობესაშვილი.

მზია ქობესაშვილი ახალციხის სკოლამდელი აღზრდის დაწესებულებათა გაერთიანების ხელმძღვანელის მოადგილედ მეთოდისტის დარგში ოფიციალურად თვის ბოლომდე დაინიშნება.

"აუცილებელია ბაგა–ბაღს ყავდეს მეთოდისტი, ეს არის ჩემი პირადი მოთხოვნა. მას აქვს გამოცდილება და მუშაობდა ამ სფეროში. ვიდრე დაინიშნება ერთმანეთს გამოცდილებას გავუზიარებთ", – აცხადებს ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე.

იგეგმება თუ არა საკადრო ცვილებები გაერთიანებაში ბერიძე ამ ეტაპზე ამბობს რომ არა, თუმცა არ გამორიცხავს.

"ყველა რჩება თავის ადგილზე და რეორგანიზაციის შედეგად ყველა თანამშრომელი გადაინიშნება", – ამბობს იგი.

[თინათინ ზაზაძე, ახალციხე]