ბორჯომის გამგეობაში საკადრო ცვლილებები იგეგმება

ბორჯომის მუნიციპალიტეტის ახალი გამგებელი დიმიტრი ყიფიანი და საკრებულოს თავმჯდომარე ზაზა ჩაჩანიძე მუშაობას ოფიციალურად შეუდგნენ. ყიფიანი გამგეობაში საკადრო ცვლილებებსაც გეგმავს.

„ბუნებრივია საკადრო ცვლილებები იქნება. ახლა ვმუშაობთ სტრუქტურაზე, მოადგილეებისა და სამსახურების რაოდენობაზე, შემდეგ ალბათ ეტაპობრივად დაიწყება თანამშრომლების დანიშვნა. მთავარია სტრუქტურაზე შევჯერდეთ და მერე ვისაუბრებთ კონკრეტულ პიროვნებებზე“, – განაცხადა დიმიტრი ყიფიანმა.

გამგებლისგან განსხვავებით, საკრებულოში საკადრო ცვლილებებს არ გეგმავს საკრებულოს ახლადარჩეული თავმჯდომარე.

„მუშაობას შევუდექი ოფიციალურად, მაგრამ ჯერ თანამშრომლებს არ გავცნობივარ. საკრებულოში საკადრო ცვლილბები არ იგეგმება“, – ამბობს ზაზა ჩაჩანიძე.

გამგებელიც და საკრებულოს თავმჯდომარეც ბორჯომში არსებულ ინფრასტრუქტურულ პრობლემებზე საუბრობენ.

„არის ლოკალური ინფრასტრუქტურული პრობლემები, ძირითადად იერსახის შეცვლაზე ზრუნვა, პარკების, ხიდების, სკვერების, ბაგა–ბაღების რეაბილიტაცია, ასევე უკვე გადაიდგა პირველი ნაბიჯი საქალაქო ტრანსპორტის შეცვლაზე, ორი ახალი ავტობუსი ჩამოდის და ამ წლის ბიუჯეტში გაწერილია, რომ კიდევ ორ ახალ ავტობუსს შევიძენთ. გარდა ამისა, ახალი, დიდი მოცულობის ნაგვის მანქანის შეძენა იგეგმება“, – განმარტავს ყიფიანი.

[თამარ თოთაძე, ახალციხე]