ბორჯომის გამგეობაში საკადრო ცვლილებები მიმდინარეობს

ბორჯომის მუნიციპალიტეტის გამგეობაში განხორციელებული საკადრო ცვლილებების თანახმად მუნიციპალიტეტის გამგებლის მოადგილე სოციალურ საკითხებში დიმიტრი ყიფიანია. სოფლის მეურნეობის მიმართულებით კი ამ თანამდებობაზე გიორგი გიუაშვილი იმუშავებს.

გამგებლის ორი მოადგილე ოფიციალურად გუშინ, 24 აპრილს დაინიშნენ.

რაც შეეხება გამგებლის მესამე მოადგილეს, რომელიც ეკონომიკისა და ინფრასტრუქტურის მიმართულებით მუშაობს, ჯერ არ შეცვლილა. ბორჯომის მუნიციპალიტეტის გამგებელი დიმიტრი ბერიძე განმარტავს, რომ აღნიშნული პიროვნება ბიულეტენზე იმყოფება, შესაბამისად მისი შეცვლა ჯერ არ მომხდარა.

”გამგებლის მოადგილის თანამდებობაზე დაახლოებით 15 განცხადება იყო შემოსული, გასაუბრებაზე ექვსი ადამიანი მოვიდა. მათი შერჩევა კონკურსის წესით მოხდა”, - განმარტავს დიმიტრი ბერიძე.

გარდა გამგებლის მოადგილეებისა ბორჯომის მუნიციპალიტეტის გამგეობაში კონკურსი სამსახურების უფროსების თანამდობებზეც გამოცხადდა. კანდიდატები უკვე შერჩეულია. მათი ნაწილი თანამდებობაზე დღეს, ნაწილი კი 1 მაისს დაინიშნება.

”ეკონომიკის სამსახურის უფროსად გიორგი ტალახაძე დაინიშნა. ადმინისტრაციულ სამსახურში ლევან ნატბელაძემ დაიწყო მუშაობა, საფინანსო სამსახურში მაია ბოჭორიშვილი, კულტურის სამსახურში კი მარინა გელაშვილი დაინიშნება, - განმარტავს ბორჯომის მუნიციპალიტეტის გამგებელი და ამატებს, რომ კონკურსი მხოლოდ სოციალური სამსახურის უფროსის თანამდებობაზე არ ჩატარებულა, რადგან აღნიშნული სამსახურის უფროსიც ბიულეტენზეა გასული.

გარდა ამისა, დღეს ჩატარდა კონკურსი ტერიტორიული ორგანოს რწმუნებულების თანამდებობებზე. 11 რწმუნებულის დანიშვნა ორი დღის ვადაში უნდა მოხდეს.

”დღეს გავესაუბრებით კონკურსის მონაწილეებს, მათ მიენიჭებათ ქულები, ვინც ყველაზე მეტ ქულას დააგროვებს, იქნება ისევ ორი დღის საპრეტენზიო ვადა გათვალისწინებული და ამის შემდგომ მოხდება მათი დანიშვნა”, - განმარტავს დიმიტრი ბერიძე.

[თინათინ ზაზაძე, ბორჯომი]